Lars Løkke Kinami inuussutissarsiornikkut naapeqatigiinnermi peqataasoq

Statsministeri Lars Løkke Rasmussen sapaatip akunnerani aggersumi pisortatigoortumik Kinamut tikeraaleruni uumasut pandat marluk isumaqatigiissut malillugu aappaagumiit Københavnip uumasuusivissuaniilertussat alakkassagunigit tupinnassanngilaq.

Tassami kinamiut isumaqartarput pandanik isumaqatigiissuteqartoqarsimagaangat attaveqaqatigiilluartoqartoq. Taama Kina pillugu ilisimasalik Clemens Stubbe Østergaard, Nordisk Institut for Asienstudier-mi seniorforskeri oqarpoq.

- Nunat marluk akornanni immikkuullarissumik illugiilluni niueqatigiinnissamik isumaqatigiissutitut ilisarnaatitut taaneqarsinnaavoq. Pilersaarusiorluakkamik suleqatigiinneq isumaqatigiissummi taamaattumi piusarpoq, oqarpoq.

Præsidenti naapissavaa
Ministerit arlallit kiisalu danskit inuussutissarsiortut qaffasissumik inissisimasut arlallit Kinamiipput, tassani ilaatigut Løkkep præsidenti Xi Jinping naapissallugu.

Tassani danskit-kinamiullu akornanni sulinissamut pilersaarummik pisortatigoortumik saqqummiussassamik suleqatigiinnerup pioreersup ingerlateqqinneqarnissaanut sanasoqarnissaa sammineqassaaq. Tassani danskit kinamiullu oqartussat 80-it akornanni suleqatigiinnermik nukittorsaasoqassalluni.

Clemens Stubbe Østergaard malillugu tamanna ilisimasanik avitseqatigiinneruvoq qaffasissumik inissisimasoq. Tassami Kinamiut isumaqarput Danmarkimi inuiaqatigiinni ajornartorsiutinik aaqqiiniarnitsinni aaqqiissutinik ajunngeqisunik nassaarsimasugut, assersuutigalugu inuussutissanut isumannaallisaanerit avatangiisinullu mianerinninnissamik suliniuteqarnernut tunngasut.

Avammut tunisinermi periarfissat
Suleqatigiinnermi Danmark Kinami ineriartornermik sunneeqataanissaminut toqqaannartumik periarfissaqalissaaq. Tamannalu danskit suliffeqarfiutaannut iluaqutaasinnaavoq, DI-mi pisortap tullia Peter Thagesen oqarpoq.

- Danmarkip Kinamiut pinngortitamut, silaannaap pissusaanut peqqinnissamullu tunngasunut - ilaatigut aamma inuussutissanut upalungaarsimanissamut unammillernartunut pingaarutilinnut isumassarsiortissinnaassavai.

- Tamakkuninnga suliaqarnermik sunneeqataasinnaagutta isumassarsiortitsisinnaallutalu taava aamma Kinamut nioqqutissanik tunisisinnaanitsinnut periarfissaqarlualernissarput naatsorsuutigissavarput.

Danmarkip Kinallu qanimut suleqatigiinnerat nunat marluk akornanni suleqatigiinnertut sivisuutut ingerlanneqarluartutullu taaneqarsinnaavoq. Ukiunilu kingullerni ministerit assigiinngitsut qinigaaffinni assigiinngitsuneersut tikeraartuartarsimallutik, Clemens Stubbe Østergaard oqarpoq.