paatsoortitsineq
Lars-Emilip atsiorneq utoqqatsissutigaa
Lars-Emil Johansen (S) Inatsisartunut siulittaasutut Siumumut ilaasortanngortumut atsioqataasoq
Sermitsiaq.AG-p ippassaq allaasereriigaatut, piviusulersaarummik filmiliortoq inuusuttoq Kaaleeraq Møller Andersen Siumumut ilaasortanngorpoq.
Tamanna angerlarsimaffimmi pisumi pivoq, tassanilu aamma Lars-Emil Johansen (S) pappiaqqamut atsioqataavoq. Ajornartorsiutaasorli tassaavoq, 'Inatsisartut siulittaasuat' aqqata ataani allaqqammat.
- Matumuuna oqaatigissavara utoqqatsissutigalugulu ajuusaarutigigakku Siumumut ilaasortanngornissamik siunertaqarnermik allakkiamut atsioqataasimanera paatsuunganermik pilersitsisimammat, Lars-Emil Johansen allappoq.
Nammineq inuttut atsiugaq
Taanna Inatsisartunut siulittaasutut Kaaleeraq Møller Andersen peqatigalugu filmi 'Kalaallit Nunaata siunissaa' takutinneqarnerani peqataavoq.
Uummannami filmip takutinneqarnerata kingorna ilaasortanngornissamut allakkiamut atsiorpoq, kingornalu Facebookimi 'Misigisaq imaannaanngitsoq' oqaasertaliullugu assimik saqqummersitsivoq.
Assi maanna saqqummiussaa peerneqareerpoq.
Atuaruk: Inuusuttoq pikisitsisoq Siumumut ilannguttoq
- Atima ataatungaani – ungaluutit iluanniugaluaq – 'Inatsisartut siulittaasuat' allanneqarsimammat pissutissaqartumik paatsuungassutigineqalersimavoq Inatsisartut sinnerlugit Inatsisartulluunniit siulittaasoqarfiat sinnerlugu atsiorsimasinnaanersunga. Soorunami taamaattoqaqqajanngilaq, atsiornerami uanga nammineq inuttut taamaallaat atsiornerigakku Lars-Emil Johansen tusagassiuutinut nalunaarummini allappoq.
Lars-Emil Johansen ullumikkut Siumumi aqutsisunut ilaanngilaq, taamatullu ilaasortanut tunngasunik suliaqanngilaq. Partiip allattaanera Mikael Petersen pappiaqqamik atsioqataasuuvoq.