eqqaaniut
Lars-Emil: Otto Steenholdtip Kalaallit Nunaat nutaajunerusoq ilusilersueqataaffigaa
Atassummi politikeriusimasup toquneranut Inatsisartut siulittaasuat assut sunnerteqqavoq
Kalaallit oqaluttuarisaaneranni nutaajunerusumi sunniuteqarsimasut malunnaatillit ilaat. Qinikkatut inuk nuannaartoq, taamaattumillu Nunatsinni Danmarkimilu ikinnguterpassuaqarlunilu ilisarisimannitserpassuaqartoq.
Inatsisartut siulittaasuata Lars-Emil Johansenip Atassummi politikeriusimasoq, Otto Steenholdt, qanittukkut 80-nik ukioqarluni toqusoq taama oqaatigaa.
Atuaruk: Otto Steenholdt toquvoq
Naapeqatiginnittartoq
- Atassummut siulittaasuunermini illuatungiliuttuuvoq nukittooq, naapeqatigiiffissarsiornikkut inerititaqarfiusunik aaqqiissuteqarnissamut peqataanissaminut tunuarsimaanngitsoq. Tamanna ilaatigut pivoq namminersornerulernerup eqqunneqarnerani Kalaallit Nunaatalu taamanikkut EF-iusumit ilaasortaajunnaarnerani, Lars-Emil Johansen eqqaaniummini erseqqissaavoq.
Piniartuuneq
Otto Steenholdt politikkikkut nukittuujunera peroriartorneranit aamma ilinniarneranit pilertoq, Inatsisartunut siulittaasup tikkuarpaa.
- Piniartoqarfimmi peroriartorsimanini Ottop puigunngisaannarsimavaa, ilinniartitsisutullu ilinniagaqarnermigut ilisimasalikkaminik tamanna tapertalerlugu ulluinnarni ajornartorsiutit naalakkersuinikkut aaqqinniarlugit suliaqarnermini tunngavigisimallugu, Lars-Emil Johansen oqarpoq.
Atuaruk: Atassutip Otto Steenholdt eqqaaniarpaa
Otto Steenholdt inuusuttut naalakkersuinermik suliallit arlallit 1971-imi Kalaallit Nunaata Landsrådianut qinigaasut ilagaat.
- Nipi ersarissoq kulturikkut pingaartitatsinnik Danmarkimillu naalagaaffeqatigiinnermik illersuisoq. Qinikkatut ilisarnaatigaa oqallorinnini erseqqissunillu tunngavilersuisinnaanini,qinigaaffimmini tamani ilisarnaatigisani, Lars-Emil Johansen taama eqqaamasaqarpoq.
Atuaruk: Kielsen Steenholdt pillugu: Naalagaaffeqatigiinnerup maligassiuilluartoq annaavaa
Pinngortitamik nuannarisalik
Piniartup erneratut nunaqarfimmiutullu Otto pinngortitamiinnernik nuannarisaqarlunilu pinialerituujuvoq, Lars-Emil Johansen oqarpoq.
- Nuliani Hanne ilaquttanilu allat ilagalugit Danmarkimut nooreeraluarluni, tuttut nalaanni ukiut tamaasa Nuuliartuarsimavoq, piniariarluni kalaaliminernillu pingaarteqisaminik ukiornissaanut katersiartorluni, Lars-Emil Johansen oqarpoq.