Ajunaarnersuarmit eqqugaasut

Lars-Emil Johansenip Kim Kielseni Uummannarmukarnissaanik qinnuiginnittoq

Inatsisartut Siulittaasoqarfiata Naalakkersuisut siulittaasuat, Kim Kielsen ajunaarnersuaqarfimmut najuukkiartornissaanik qinnuivigaa. Ataatsimiititaliat arlallit Danmarkimut Savalimmiunullu angalasut angerlaqquneqarput.

Lars-Emil Johansen
Lars-Emil Johansen, formanden for Inatsisartut, føler behov for at anmode Kim Kielsen om at besøge de katastroferamte områder.

- Uummannap eqqaani tassanngaannartumik pinngortitap nammineq pilersitaanik ajunaarnersuaqarneranut atatillugu Inatsisartut Siulittaasoqarfiata ataatsimiititaliat marluk angalaneri unitsippai ataatsimiititaliallu pingasut Ilulissiaqqullugit, tusagassiuutinut nalunaarummi allassimasoqarpoq.

Ataatsimiititaliat marluk angerlartinneqartut

- Uummannap eqqaani tassanngaannartumik pinngortitap nammineq pilersitaanik ajunaarnersuaqarneranut atatillugu Inatsisartut Siulittaasoqarfiat ullumi sapaammi oqarasuaatikkut ataatsimiippoq aalajangerlugulu Aningaasaqarnermut Akileraartarnermullu Ataatsimiititaliaq kiisalu Sanaartornermut Ataatsimiititaliaq ulluni makkunani Danmarkimi Savalimmiunilu angalasut ingerlaannartumik angerlartinneqassasut, Lars-Emil Johansen paasissutissiivoq.

- Ajunaarnersuaqarnerani innuttaasut eqqugaasorpassuit Siulittaasoqarfiup annertuumik misiginneqatigai. Tamatumunnga atatillugu Siulittaasoqarfiup kissaatigaa Inatsisartut pisumi pissarsiariuminarnermikkut tapersersuillutillu annertunerpaamik ikiuussinnaassasut.

Kim Kielsenimut nassiussaq

- Siulittaasoqarfiup taamaatuttaaq Naalakkersuisut Siulittaasuat qinnuigaat piaarnerpaamik Uummannamut Nuugaatsiamullu orniguteqqullugu, ajoqusiinerit annertussusiat nammineq takusarlugu minnerunngitsumillu pisumi alianartumi innuttaasut eqqugaasut najoriartorlugit, Lars-Emil Johansen allappoq ilassuteqarlunilu:

- Siulittaasoqarfiup taamatuttaaq aalajangerpaa ataatsimiititaliat angerlartinneqartut marluk kiisalu Ilaqutariinnermut Peqqissutsimullu Ataatsimiititaliaq qinnuigineqassasut piaartumik Ilulissiaqqullugit taakanilu allaffigigallagassaminnik pilersitseqqullugit, pisut qaninnerpaamik malinnaaviginissaat ikiuunnissamullu piareersimanissaq eqqarsaatigalugit.

Kim Kielsen Facekookimini

Kim Kielsenip Facebookimini ima oqaaseqarpoq:

- Ippassaq unnukkut pisimasumut oqaasissaaleqinaqaaq. Pinngortitarsuarput qanoq allanngoriataartigisinnaasoq kingumut misigaarput Nuugaatsiap ungasinngisaanni nuna sajupallassimammat. Tassaarsuaq nunaqarfinnguaq aqqusaarmagu inuit, illut, tunitsivik, atuarfik,pisiniarfik pisattallu aseruatersimavai ilaalu imaanut ammussorlugit. Ujaasineq ingerlanneqarpoq, Nuugaatsiarmiullu Uummannamut ingerlanneqarput. Pisimasoq sakkortoqaaq Nuugaatsiarmiut Nunaqqatigullu eqqaamaqaakka. ikiuuttorpassuillu nukissaqarlutik sulilluarnissaannik kissaappakka.

Kim Kielseni piffissami matumani Danmarkimiippoq.

Powered by Labrador CMS