Uummatikkut pilattaanerit
Lars-Emil Johansen uummammigut pilattartissaaq
Inatsisartut Siulittaasuat Lars-Emil Johansen sapaatip-akunnerata siuliani uummallulluni Rigshospitalet'imut unitsinneqarpoq. Uummatit nakorsai misissuisimapput, paasinarsivorlu uummataa pilattarneqartariaqartoq.
Rigshospitalet'imi nakorsat Lars-Emil Johansen, 71-nik ukioqartoq, uummataatigut pilattarusuppaat. Pilattaaneq pingasunngornermi ualikkut pissaaq.
Isumalluartoq
- Isumalluarpunga, Lars-Emil Johansen Sermitsiaq.AG'mut oqarpoq.
- Suliaq annertuvoq, qujanartumillu Rigshospitalet'imi nakorsat pikkorissorsuit pilattassavaannga. København'imiinnera assut nuannaarutigaara, Lars-Emil Johansen pilattarneqareeruni Nuummut angerlartussaq oqarpoq.
Angalernermini tallimanngormat kingullermi peqqiilleriasaarpoq. Uummatit nakorsaanik attaveqarpoq, taassumalu uummataa misissorsimavaa. Taanna imaasiallaannaq takusaqarsinnaasimanngilaq, Lars-Emil Johansenilu erngerluni Rigshospitalet'imut nuunneqarnissaa innersuussutigaa, tassanilu Inatsisartut Siulittaasuat pilattarneqassasoq ullumi oqaluttuunneqarpoq.
Sivikinnerpaamik qaammatini pingasuni sulinngiffeqartussaq
Tamatuma kinguneraa, Lars-Emil Johansen qaammatini tulliuttuni politikkikkut takussaajunnaarnissaa.
- Nakorsat oqaatigaat, sivikinnerpaamik qaammatini pingasuni peqqissassasunga. Pilattartinneq annertuvoq, soorunalimi nakorsat siunnersuutaat malissavakka, Lars-Emil Johansen oqarpoq.