qinersineq
Lars-Emil: Imaassinnaavoq qineqqusaaqqittunga
Politikkikkut misilittagaqarluartoq Lars-Emil Johansen Siumumi siulittaasunngorniunnermi siulittaasutut toqqarneqanngikkaluarluni suli politikkimi akuunissaminut nukissaqarpoq
Lars-Emil Johansen politikkikkut misilittagaqartorujussuuvoq. Siumumi siulittaasuusareerpoq, folketingimi ilaasortaareerpoq, Inatsisartuni Naalakkersuisunilu siulittaasooreerpoq.
Siumut arfininngormat siulittaasumut qinersimmat qinigassanngortippoq, naak siulittaasunngunngikkaluarluni politikkikkut suli akuunissani nukissaqarfigaa. Inatsisartunut qinersisoqalerpat 68-nik ukiullip Lars-Emil Johansenip qineqqusaarnissani mattutinngilaa.
- Ima oqaatigisinnaavara: Imaassinnaasoq qinigassanngortittunga. Inatsisartunut qinigassanngortissasunga Siumut Nuummit kaammattorneqarpunga, allanit aamma kaammattorneqarpunga, Lars-Emil Johansen Sermitsiaq.AG-mut oqarpoq.
- Soorunami qinigassanngortissaguma qineqqusaarsinnaasutut akuerineqaqqaassaanga, tamanna ajornaquteqarnavianngitsoq naatsorsuutigaara.
Qineqqusaarnissani ammaffigaa
- Siumumi siulittaasumik qinersisoqareersoq Facebookimi ima allapputit: 'Inuuneq tamarmi ilinniarfiuvoq, Ullumi uanga nassuerutigisariaqarpara siulittaasumut qinigassanngortittuni piukkunnarnerpaajusimanaga Ataatsimeersuartut aaqqissuilluarsimapput piareersarluarsimallutillu siulittaasussssiornermi kiap qinerneqarnissaa eqqarsaatigalugu. Qinigassanngortinnissara qamannga qamanngavik kissaatiginagu piareersarsimanagulu qinigassanngortikkma taava soorunami naatsorsuutigisinnaannaasimanngilara pitsaasumik angusaqarnissara'. Partiimi siulittaasunngornissaq tamaviaarlutit anguniannginnakku? Siulittaasussamut qinersisoqaliivinnerani aatsaat qinigassanngortipputit
- Aap, pissutaaqataasut ilagaat, Lars-Emil Johansen akivoq.
- Kim Kielsenip Siumumi siulittaasunngornera nuannaarutigigit malunnarpoq
- Aap nuannaarutigaara. Soorlu aamma allattunga Kim Kielsen pikkorissuuvoq, inatsisartutut naalakkersuisutullu misilittagartuujulluni, qularutiginngilaralu oqallisillaqqississaqqaartoq. Uanga nammineerlunga aamma parteera sinnerlugu Kim Kielsenip siulittaasunngornera nuannaarutigaara. Aamma qularutigineqarsinnaanngitsumik ajugaavoq, Lars-Emil Johansen oqarpoq.
Lars-Emil Johansen siulittaasutut qinersinermi 17-init taaneqarpoq, Kim Kielsen 44-nit, Nick Nielsen aamma Doris Jakobsen marlunnit taaneqartut.
Inatsisartunut qinersisoqassaaq tallimanngornermi novembarip 28-ani.