aviisinut tapiissutit
Lars-Emil aviisinut suliaq pillugu: Neriuppunga taama pisoqaqqissanngitsoq
Inatsisartut siulittaasuata Naalakkersuisut aviisinut tapiissutinik suliaqarnerat kusanaannerarpaa
Kalaallit Nunaanni qinikkatut suliaqartut misilittagaqarnersaat Lars-Emil Johansen isumaqarpoq Naalakkersuisut immikkut illunnartunik tunngaveqassasut Sermitsiaq.AG-mut aviisinut tapiissutit 2,3 million koruuniusut Inatsisartuni Aningaasaqarnermut Ataatsimiititaliamit isumaqatigiissumik tunniunneqarnissaannik innersuussinerup akerlianik iliornissaminnut.
Nalinginnaasumik Naalakkersuisut naalattussaapput aningaasaqarnermut ataatsimiititaliaq suliami ersarissulioraangat.
- Aningaasaqarnermut Akileraartarnermullu Ataatsimiititaliami katitigaaneq Inatsisartut katitigaanerattut ippoq. Ataatsimiititaliaq isumaqatigiissumik isummeraangat Naalakkersuisut peqqussummik amerlanertigut malinnittussaasarput. Naalakkersuisut Aningaasaqarnermut Akileraartarnermullu Ataatsimiititaliap innersuussutaanik itigartitsippata tamanna taamaallaat pisinnaasoraara suliamut atatillugu ilungersunartunik tunngavissaqarpat, Inatsisartut siulittaasuat oqarpoq.
Ileqquusunik avaqqutaarineq
Aviisinulli tapiissutit tunniunneqannginnissaannut tunngavissamik nassaaruminaatsuusoq allaffissornermik immikkut ilisimasallit isumaqarput.
Pisortatigoortumik tunngavilersuutituaasimavoq aviisit sinneqartoortarnerat namminerlu aningaasaatitigut patajaatsumik inissisimanerat. Taamatulli tunngavilersuineq allaffissornermik immikkut ilisimasalinnit aningaasaqarnermullu ataatsimiititaliamit atorsinnaasorineqanngilaq. Aningaasanut inatsimmi missingersuutit immikkoortuini aningaasaqarnermut tunngasunik allassimasoqanngilaq; taamaallaat allassimavoq pissarsisussat tassaasut aviisit marluinnik oqaasertaqartumik saqqummersartut.
Tamanna sullerlunnerusimasinnaavoq. Aningaasaqarnermut Ataatsimiititaliaq naapertorlugu ilungersunarneruvoq Naalakkersuisut Inatsisartut aningaasaliissutaannik tunniussiumannginnerat: Inatsisinik atortitsisut inatsisiliortut nakkutilliisullu peqqussutaannik suusupaginninnerat uissuumminarluinnartutut oqaatigineqarsinnaavoq.
Lars-Emil Johansenip suliap ingerlasimaneranut naliliinera Naalakkersuisut Siulittaasuata Naalakkersuisoqarfiani eqqarsaatigineqarluartariaqarpoq.
- 2014-imi tusagassiuutinut tapiissutinut tunngasut suliarineqarnerat tamaat kusanaatsutut isigaara. Neriuppungalu taamatut suliaqarneq siunissami ileqquliunneqassanngitsoq.
Allaaserisaq tamaat AG-mi sapaatip-akunnerani saqqummersumi matuma ataani pisiarisinnaasanni atuaruk: