Carsten F.-Hansen-skandalen
Lars-Emiili Carsten Frank Hansenimik ikiuinnginnerarpoq
Carsten Frank Hansenimik naalakkersuisoqarfimmi pisortatut nammineq atorfinitsitsisimanerminik Berlingskep oqarnera Siumumeersup Lars-Emil Johansenip ilumuunnginnerarpaa
Ilumuunngilaq Berlingske allammat Inatsisartut siulittaasuat Lars-Emil Johansen, Siumut, Carsten Frank Hansenip Aningaasaqarnermut Nunallu iluani Pissutsinut Naalakkersuisoqarfimmi pisortanngortinneqarneranut sunniuteqarsimasoq.
Aamma ilumuunngilaq qallunaat aviisiat allammat Carsten Frank Hansen Lars-Emil Johansenip ´qanimut ikinngutaasa ilagigaat´, aammalu Inatsisartut siulittaasuata ´nammineerluni taanna atorfimmut ivertinneqartussatut inassutigisimagaa´.
Taamatut tusagassiorfinnut nalunaarutikkut allappoq Lars-Emil Johansen, taamaasillunilu oqarnerit taakkua marluk ilumuunnginnerarlugit.
– Taamaasilluni erseqqissarneqassaaq Carsten Frank Hansen sunnguamilluunniit ilaquttama qanimulluunniit ikinngumma ikinngutiginngimmassuk. Ataasiarlunga maanna allaffinni kaffisoqatigisimavara - Carsten Frank Hansenip piumasaanik. Taamaasilluni Carsten Frank Hansenip atorfinitsitaanera uannit ikinngutitut ikiuiniarnertut taaneqarsinnaanngilaq, suliassamut tamatumunnga uanga attuumassuteqannginnama, Lars-Emil Johansen nassuiaavoq.
Atorfimmut inassutigisinnaasimanngilaa
– Tamatuma saniatigut eqqortuliorneq pissutigalugu oqaatigisinnaavara Carsten Frank Hansenip atorfinitsinneqarnera sioqqullugu Ramsdal-imit telefonikkut attaveqarfigineqarsimasunga. Ramsdal oqarfigaara Carsten Frank Hansen nalinginnaasumik pitsaasutut isigigiga, piginnaasaali inuussutissarsiornermik ingerlatsivimmiinnerugunartut pisortat allattoqarfianinngarnit. Taamaasillunga taanna uparuagassaqartissimanngilara, namminerli allattoqarfimmi qaffasissumik atorfinitsinneqarnissaa inassutigisinnaasimanngilara, ilisimasakka malillugit pisortani allaffissornermik misilittagaqanngimmat, Lars-Emil Johansen nassuiaavoq.
Carsten Frank Hansenimik mamianartuliamik Sermitsiaq.AG-p allaaserisai tamaasa atuakkit