Se fotogalleri
Laila Ukiaanerani OL pillugu: Misigisaq puiunngisaannassavara
Freestylemik halfpipertartoq Laila Friis-Salling Ukiaanerani OL Korea Kujallermi ingerlanneqartumi misigisani nuannernerpaat oqaluttarai. Ukiumilu pisartup kingulliup naammassinerata kingorna unammersuarnerni peqataasarnini ikilisarniarpai.
- Ammaanersiorneq unammeqqaarnerlu OL-imi peqataaninni puiunaannersaapput.
32-nik ukiulik Laila Friis-Salling, Korea Kujallermi Ukiaanerani OL-imut peqataasoq, Sermitsiaq.AG-mut taama oqaluttuarpoq.
- Ammaanersiortoqarnerani nunarsuarmiut tamarmik isiginnaaqataapput, angajoqqaakkalu unammisarfissuarmeeqataapput, uangalu skærmersuarmi imminut takusinnaallunga. Misigisaq nuannersupilussuuvoq , puiunngisaannassavarali, taanna oqaluttuarpoq.
Ajutoornini ugguaringaa
Freestylimik halfpipernermi pissartanngorniutivinnermut anngunniunnermi taanna peqataasuni 24-ni 23-tut inissippoq. Taamaasilluni unammersuarnermi angusarinnerpaat aqqaneq-marluk kisimik pissartanngorniutivinnissamut ingerlaqqittarmata, pissartanngorniutivinnerni peqataanngitsoorpoq.
- Unammeqqaarnialerama pissagaqaanga. Unamminermi siullermi ajutoornanga bane naammasserusukkakku eqqissisimaqaanga. Erfalorsorput aamma takuara, assullu nuanneqaaq. Unamminerup tullia sukataarfigaara, ajoraluartumilli ajutoorlunga. Ajutoorninni eqqarsaatiga siulleq tassaavoq ‘ajoqaaq’. Ajutoornera uggorinngilara, ajutoornerimmi pisinnaasarput, tamannali ugguaatigerusunngilara, taanna erseqqissaavoq.
- Unamminernilu kingullerpaatut inissisimannginamma pitsaaqaaq. Ukiaaneranili OL-imut peqataasimasimanera qanoq annertutigisoq kingumut qiviarsinnaanngorpara. Immaqa angusarissaarnerusimasinnaangaluarpunga, kisianni pisut pereerput. Pissartanngorniutivinnernulli anngussimangaluaruma tupaallannartorujussuusimanngaluarpoq, nalunngilarali peqataasut allat uanniit pitsaanerujussuusut, taanna oqarpoq.
Atuaruk: Video: - Nuannersuaarpoq
Frankrigimi World Cup-erneq
- Siunissami susoqassua?
- Martsip qaammataani ukiumi kingullermi pisartumi Frankrigimi ingerlanneqartussamut World Cup-imut peqataassaannga. Tamatuma kingorna timersorunnaassaanga, taamaakkaluartoq timersorneq alavinnavianngilara. Kisianni ilumut unissanerlunga unammersuarnerilluunniit ikinnerusut peqataaffigisassanerlugit suli aalajangiutivinngilara. Massakkut unammersuarnerit peqataaffigiffigerusunneruakka peqataaffigisartakkakkalu ikilisarlugit, taanna akivoq.
Laila Friis-Sallingip ataarutini taamaatikkunigit sulerissanerluni aamma suli aalajangersimanngilaa.
- Perisarfissakka suli eqqarsaatigaakka, Laila Friis-Salling oqarpoq.
Assip ataani ‘tullia’ toorlugu assit takukkit