Ukiuunerani OL
Laila Friis-Salling ukiuunerani OL-imut peqataassaaq
Korea Kujallermi OL-ertoqarnerani kalaallit timersortartut marluk peqataassapput. Freestyle halfpiperluni sisorartartoq, Laila Friis-Salling OL-imut peqataasussanngorluni ilisimatitsivoq
- OL-imut peqataassaanga!
32-nik ukiulik freestyle halfpiperluni sisorartartoq, Laila Friis-Salling Nuummeersoq, Sermitsiaq.AG-mut ilisimatitsivoq. Taamaalilluni ukiuunerani OL-imut Korea Kujallermi illoqarfimmi Pyeongchangimi peqataassaaq. Ukiuunerani OL-erneq februaarip 9-anni aallartissaaq.
Laila Friis-Salling pisussami kalaallini peqataasussat aapparissavaat. Ujakkaartartoq Martin Møller aamma ukiuunerani OL-imut peqataassaaq.
Laila Friis-Salling World Cuperluni unamminernut arlalinnut qaammatini kingullerni peqataavoq, taamaalillunilu anngulluni. Freestyle halfpiperluni unamminermi 24-t peqataassapput.
Danmark ukiuunerani OL-ertoqarnissaanut inissamik ataatsimik pissarsisimanerarlugu Danmarks Idræts-Forbundimit mailinnassimallutik, Kalaallit Nunaanni Timersoqatigiit Kattuffianni pisortaq Carsten Olsen, Sermitsiaq.AG-mut ilisimatitsivoq.
- Laila Friis-Sallingimut tunngatillugu suli qulakkiivinneqanngilaq, kisianni Danmarks Idræts-Forbundip inissaq ataaseq tiguniarpaa, taamaalilluni OL-eqataasinnaassalluni. Taamaammat pissangalluta nalunaaruteqartoqarnissaa utaqqivarput, Laila Friis-Sallingip OL-imut peqataanissaa neriuutigaarput, taanna Sermitsiaq.AG-mut oqarpoq.
Timersortartut marluk ukiuunerani OL-imut peqataalernera, Nunatsinni timersornermut qanoq isumaqarpa?
- Nuannertorujussuuvoq. Angummik arnamillu peqataasoqalertoq pitsaalluinnarpoq, Carsten Olsen oqarpoq.