Skip to main content

Kuupiup qinersinermi naliliinera: Anorersuarmik utaqqinitsinni

Ulluni aggersuni tupaallannartoqarumaartoq naatsorsuutigisinnaagipput isumaqarpunga, Kuupik Kleist qinersineq pillugu naliliinermini allappoq.

Apriilip pingajuat utaqqivarput, taanna apriilip 24-anni qinersinissamut qinigassanngortittut nalunaarutigineqarnissaannut piffissaliussaavoq. Kisianni kikkut qinigassanngortinnersut ilisimasaqarfigilaalereerparput. Inuit qinigassanngortittut qinersinerup inerneranut aalajangiisuulluinnarsinnaapput, partiimit sorlermit sassarnerat apeqqutaanani.

31-t arfineq-marluukkaat

Minnerpaamik partiit arfineq-marluk Inatsisartunut inissat 31-t pissarsiaralugit ilaasortaatitaqarfiginiarsarissavaat. Ataasiakkaammi partiit avaqqullugit qinigassanngortinnissaminnut suli periarfissaqarput.

Partiit tamarmik assigiimmik taaguunneqarsimanerat takorlooriarutsigu, partiit tamarmik immikkut 4,5-it missaanni ilaasortaatitaqalissagaluarput. Amerlanerussuteqartut 16-iullutik, taamaalilluni minnerpaamik partiit sisamat amerlanerussuteqarlutik naalakkersuisoqatigiilissagaluarlutik, partiillu pingasut illuatungiliuttuullutik. Kisianni taamaattoqarneq ajorpoq. Ilaat amerlanernik taaguunneqartarput, ilaat ikinnerusunik. Tamanna eqqarsaataannaavoq.

Nuuttartut Enoksenimi katersuuttut

Partii Naleqqamut qinigassanngortillutit saqqummertut arajutsisassaanngitsut aamma tupaallannalaarsinnaapput. Partiinut allanut ilaasortaasimasut takuneqarsinnaapput, kiisalu nutaarluinnaat. Assersuutigalugu Lars Mathæussen Partii Inuit aamma Siumut sinnerlugit sassarnikuuvoq, Nikku Olsen siornatigut Inuit Ataqatigiit aamma nammineq parteerisimasani Partii Inuit qinigassanngortiffiginikuuai, maannalu Hans Enoksenip partiianiilerput. Saxtorph Didriksen aamma Siumumi ilaasortaanikoq Naleqqap qinigassanngortitaannut ilaavoq.

Nunatta Qitornai tusarfigivallaanngilagut, kisianni immaqa aamma Vittus Qujaukitsup parteerisimasaanit aamma partiinit allanit ilaasortaasimasunik sassartoqassajunnarsivoq? Nunatta Qitornaasa Nuup Qitornaasa siulittaasuat siuttoralugu namminiilivinnissamik ulluliinissaat pissangalluuta utaqqissavarput.

Ulluni aggersuni tupaallannartunik amerlanerusunik naatsorsuuteqarnissarput ilimagaara. Partii sorleq tunuliaqutaralugu qinigassanngortissanerluni aalajangersimanngikkaanni, imaluunniit partii sorleq aamma qinigassanngortittoq sorleq qinerneqarnersoq nakkutigisassarpassuaqarluni tusaaniagassarpassuaqarpoq.

Sammisat annertuut

Qineqqusaarneq aallartilaalereerpoq, misileraallunilu saqqummiussisoqallattaarluni. Ilaat unitsinneqartarput imaluunniit aallartinneqartarlutik. Allanit imaluunniit nammineq aallartitsisunit. Naatsorsuutigineqarsinnaasutut aalisarneq aammaarluni sammisat annertuut ilagissavaat. Aalisarnermut inatsit imaluunniit allannguutissatut kalerriutigineqartut qinersinissaq sioqqullugu naammassineqanngillata. Tassa tunngaviusumik aallaqqaataaniik aallartittoqarsinnaavoq, ukiuni marlunni kingullerni pikkunartumik oqallittoqarneranut ililluni.

Inuit Ataqatigiit ’’nunarsuarmi pitsaanerpaamik’’ aalisarnermut inatsimmik kissaateqarnertik aamma Kalaallit Nunaat aalisarnermi nunarsuarmi siuttunngornissaanik oqariartuuteqarput. Tamatuma inuit attaveqatigiittarfiini sakkortuumik isummersortartut aalassatsilaavippai.

Aqaguani Jess Svanep Siumut sinnerlugu inatsit siorna siunnersuut saqqummiunneqartoq assigalugu naammassineqarnissaa oqaatigigaa, aalisarnermut naalakkersuisuusimasoq Karl Kristian Kruse, iluarsiisoqarumaartoq oqaaseqarpoq.

Namminiilivinneq ’’takornartanik’’ ilallugu

Namminiilivinnissaq pillugu oqallinnermi oqallisigineqartuartoq – tassa Naalagaaffiup Kalaallit Nunaata pilersinniarneqarnera. Oqallinnerup maanna allaanerulaarneranik oqartoqarsinnaavoq, sammisaq immikkut ilaqarami.

’’Takornartat’’, ingammik qallunaat, sunalu tamarmi qallunaarpaluttoq malunnaatilimmik inississimapput, tamanna ’’oqallinnermik’’ taaneqarsinnaavoq.

Nunasiaataasimaneq kisimi oqqatigineqalinngilaq, kisianni aamma kalaallit akornanni namminiilivinnissap qanoq sukkatigisumik pinissaa pillugu oqallisigineqassapput.

Partii Naleqqap maannamuugallartoq 2021-imi – tassa ukiut pingasut qaangiuppata – Kalaallit Nunaat præsidenteqalerluni namminiilivissasoq kissaatigalugu siuttuupput. Taammattoq Partii Naleqqap kisimiilluni tamanna naammassisinnaanngikkaa Hans Enoksenip paasillugu oqaatigivaa.

Mittarfiit, imigassamut inatsit, meeqqat atugaat, ineqarneq allarpassuilluni tusarfigiumaarpagut.

Kuupik Kleist, ukiuni tallimani politikkikkut qaffasissumik suliaqarsimanngitsoq, politikkikkut suliaqarnermini piffissami malunnaarteqarnerpaat ilagaat. Naalakkersuinikkut suliaqarnermini IA-mi siulittaasunngornini, Naalakkersuisuni siulittaasunngornini aamma Folketingimut ilaasortanngornini iluatsissimavai. Atorfiit kingulliit marluk taakkartorneqartut IA-mi siullerpaalluni anguai. Ukiuni kingullerni politikki pillugu tusagassiuutini naliliillattaartarpoq.

Læs hele sagen:

  1. Mens vi venter på stormen
  2. IA bliver størst og Siumut holder skansen – måske!
  3. IA anginerpaanngussaaq aamma Siumut inissisimaffimminiiginnassaaq - immaqa!
  4. Apeqqutit pisariaqartut - akissutissallu!
  5. De nødvendige spørgsmål – og svar!
  6. Hvem kan vi stemme på?
  7. Kikkut qinersinnaavagut?
  8. Angusaq ersarluttoq
  9. Et grumset resultat
  10. Inuit Ataqatigiit akiligassaq akilerpaat
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER