unnerluutigineqartoq
Kuupik Kleist: Illersuisora oqaloqatigaara
Naalakkersuisunut siulittaasuusimasup politiinut tunniunneqarnini oqaaseqarfigivallaanngilaa
Innuttaasut sisamat Kuupik V. Kleist, Aleqa Hammond aamma Steen Lynge politiinut suliassanngortippaat ullumi pingasunngornermi.
Nunatta karsianit atornerluisimasutut politiinut unnerluutigineqarput. Tassani suliami Aleqa Hammondimut suliaq annertunersaajuvoq, tassami 204.000 koruuninik aningaasanik atorsimanera suliarineqartussaassaaq. Siullermik nalunaarutigineqareerpoq Aleqa Hammond 106.000 koruuninik atornerluisimasoq.
Suliffeqarfiup Deloittesip decembarimi misissuisimanini saqqummiuppaa, tassanilu Kuupik Kleis 20.288 koruuninik atornerluisimasoq paasineqarpoq. Misissuineq akuerinagu Kuupik Kleist oqariartuuteqartareerpoq.
- Illersuisora ataatsimeeqatigaara. Taamaammat annertunerusumik oqaaseqarsinnaanngilanga. Kikkulluunniimmi politiinut suliassanngortitsisinnaapput. Soorunami uangaalluni nuannerpallaanngilaq, suliarli qanorluunniit inerneqassagaluarpat siornatigut takutereerpara akisussaaffimmik tigusinera, Kuupik Kleist Sermitsiaq.AG-mut oqarpoq.
Politikkerisut inuuneq inuunermut sunniuteqartartoq oqaatigaa.
Suli nunatta karsianut akiitsoqarnerluni Kuupik Kleistip oqaatigisinnaanngikkallarpaa.
Naalakkersuisutut siulittaasuunermi nalaani 25.000 koruuninik akiitsoqartareerpoq, taakkulu utertinneqareerput.