Kuupik Inatsisartuni ilaasortaajunnaarpoq

- Inatsisartut suleriaasiat aammalu Inatsisartut il.il. akissarsiaat il.il. pillugit aalajangersakkat naapertorlugit, matumuuna Inatsisartunut ilaasortaaninnit tunuarniarlunga qinnuteqarnera Siulittaasoqarfimmut akuereqqullugu qinnuteqarpunga, ullumikkut 29. september 2014-imiit atuutilersussamik.

Inatsisartuni ilaasortaq Naalakkersuisunilu siulittaasuusimasoq Kuupik Kleist, Inuit Ataqatigiit, Inatsisartut allaffeqarfiannut mailikkut nalunaaruteqarpoq.

Aleqa, aamma illit tunuarit
- Piffissami qaangiuttumi Namminersorlutik Oqartussanut akiitsorilersimasakka naammattumik eqeersimaarfigisimannginnakkit ajuusaarutigaara, taamaattoqarneralu kinguneqartinneqartariaqartoq isumaqarama tunuarnissannik qinnuteqarnissara aalajangiuppara, 56-nik ukiulik Kuupik Kleist nalunaarummi oqarpoq.

Aleqa Hammondip nunatta karsianit aningaasanik atuisimaneranut qulaajaasoqarnerani aamma paasinarsivoq Kuupik Kleist 25.034 koruuninik taarsigassaqartoq.

Kuupik Kleistip akiligassaqarnini Sermitsiaq.AG-mut akunnerup naanerani nassuerutigaa. Sukkanerpaamik akilerneqarumaartut oqaatigaa.

- Isumaqarama iliuuseqannginnikkut Inatsisartut naalakkersuinikkullu suliallit allat isigineqarnerat innarlerneqassasoq tunuarnissara toqqarpara, Kuupik Kleist Aleqa Hammondimut kaammattuilluni oqarpoq.

Inuit Ataqatigiinni Inatsisartunut ilaasortassatut tulliinnguuttoq aggersarneqassasoq taamaasilluni kissaatigaa.

Kuupik Kleistip politikkikkut misilittagai:

• 2009-2013 Naalakkersuisuni siulittaasoq
• 2002-2014 Inatsisartuni ilaasortaq
• 1997- Inuit Ataqatigiit Kattuffianni siulittaasoq
• 2001- 2007 Folketingimi ilaasortaq
• 1995-1996 Inatsisartuni ilaasortaq
• 1991-1995 Inatsisartuni ilaasortaq, sulisunut angallannermullu ataatsimiititaliami ilaasortaq

(Paasissutissat: IA.gl)