Kunuk Albrechtsen Neqip savaaqqanik toqoraaviani pisortanngortoq

Kunuk Albrechtsen 58-inik ukioqartoq Neqi A/S-ip siulersuisuini atorfinitsinneqarpoq fabrikschef-itut Narsami savaaqqanik toqoraavimmi.

Upernaap ingerlanerani Kunuk suliffittaamini sulilissaaq, taamaalillunilu maannakkut fabrikschefiusoq Henning Sønderup soraarninngulersoq piffissap ilaani suleqatigissallugu.

KNI-mi pisortaanerugallartoq Peter Grønvold Samuelsen nalunaarpoq.

Kunuk Albrechtsen savanik toqoraavimmi pisortaareernikuuvoq, tassami 1986-1991-imi Narsami Royal Greenland-ip tunisassiorfiani pisortaasimagami, saarullinnik raajanillu nioqqutissiornerup saniatigut savanik toqoraavik ingerlassimallugu.

1991-1993 Kunuk Royal Greenlandip Paamiuni aalisakkeriviani pisortaavoq, tamatumalu kingorna Royal Greenlandip iluani assigiinngitsuni malunnaatilinni atorfeqartarsimavoq, soorlu Tunisassiornermut Kilisaatinillu aqutsisoqarfimmi vicedirektøriusimalluni, aamma Polar Seafood-imi atorfeqarsimalluni.

- Narsami Neqi A/S-ip savaaqqanik toqoraavia KNI-mit 60 million koruunit atorlugit nutarterneqaqqammerpoq, taamaalilluni EU-p inuussutissanik tunisassiorfinnut piumasaqaatai sakkortoqisut naammas-sisimallugit. Siunertaraarpullu Neqi A/S misinnartumik peqataassasut kujataani nunaateqarnermit tunisassiat annertusarneqarnerini, savaatilinnut iluaqutaasumik aamma inuiaqatigiinnut, tassami imminut pilersorneq annertunerusoq pilersikkaanni tamanna iluaqutissartaqarmat. Taamaattumik KNI aamma Neqi-p siulersuisui sinnerlugit nuannaarutigaara Kunuk atorfimmut qinnuteqarsimammat, piginnaasai misilittagaalu Neqi-p suli ineriartorteqqinneqarnissaanut tulluarluinnartuupput, Peter Grønvold Samuelsen Neqi A/S-imi siulersuisuni siulittaasuusoq aamma oqarpoq.

Neqi-mut suliffittaarnerminut Kunuk Albrechtsen ima oqaaseqarpoq:

- Inuussutissalerinermik misilittagaqarluarpunga aamma inuussutissalerinermi malittarisassanut sakkortuunut malitsinniarnerini aallaqqaataaniit ilaasarsimavunga, sulisut piginnaasaat annertusarlugit.