Arctic Winter Games
Kunngissaq tikingajalerpoq
Kunngikkormiutut ataqqinassusilik timmisartumut Nuummukartussamut siullermut ilaassaaq
Annonse
Kunngissaq Frederik, Arctic Winter Gamesip illersuisua, sapaammi ullaap tungaani Air Greenlandip timmisartuanik siullermik Kangerlussuarmit Nuummut tikissaaq.
Timersortartunik timmisartuusseqattaarnermut ilaassanngilaq, timmisartup siulliup nalinginnaasumik timmisartuussisup ilaasut kinguaattoorsimasut timmisartuutissammagit.
Kunngissaq tallimanngormat Kangerlussuarmut tikippoq sakkutuut timmisartuannut C-130 Herculesimut ilaalluni. Pilersaarutaasimagaluarpoq ulloq taanna Nuummut ingerlaqqissasoq - Arctic Winter Gamesimulli peqataajartortorpassuit assigalugit Nuummi silarlunnera pissutigalugu kinguaattoorpoq.
Kunngissaq mittarfimmi sakkutuut inaanni najugaqarpoq, utaqqinerminilu ilaatigut piniariarsimavoq.