tikeraarnissaq
Kunngissaq nulialu nunatsinnukarnissaat piareersarneqartoq
Kunngissaq Frederik nulialu Mary aasaru nunatsinnukassapput. Piffissami sumi illoqarfiillu sorliit tikinneqassanersut suli aalajangiunneqanngilaq
Annonse
Aviisit saqqummersartut Sermitsiaq AG-llu allaaserereerpaat kunngissaq Frederik nulialu Mary nunatsinnut aasaru tikeraarumaartut. Aviisini allaaserineqarpoq illoqarfiit Ilulissat aamma Uummannaq tikinneqarumaartut.
- Paasissutissiissut kingulleq ajoraluartumik eqqunngilaq. Kunngissaq nulialu suli aalajangiutinngilaat illoqarfiit sorliit tikinniarnerlugit, aamma qaqugorpiaq nunatsinnukassanersut suli aalajangiunneqarnani, Kalaallit Nunaanni rigsombudsmandi Mikaela Engell nalunaaruteqarpoq.
Kunngissaq nulialu nunatsinnut angalanissaat suli pilersaarusiorneqartoq oqarpoq.
- Piffissami sumi illoqarfiit sorliit tikissaneraat piareeriarpat tusagassiuutinut nalunaarutigineqarumaarpoq.