øv!

Kunngissaq Kangerlussuarmi sapernguvoq

Nuummi nittaalartalimmik anorersuarnera pissutigalugu kunngissaq russillu Team Yamal Arctic Winter Gamesimut tikinngitsoorput

Kronprinsfamilien i Nuuk, inuit games, Ben Jakobsen
Kunngissap, 2015-imi aasakkut Arctic Winter Gamesimut piareersarnermut atatillugu assinga

Air Greenlandip Issittumilu Sakkutooqarfiup timmisartui tallimanngormat Nuummut timmisartuussisut kingulliit Nuummi nittaalartalimmik anorersuarnera pissutigalugu utiinnartariaqarsimapput.

Taamaasilluni Kinngikkormiutut Ataqqinassusilik Kunngissaq Frederik Yamalimillu timersortartut sisamat tassanngalu aallartitat sinneri Kangerlussuarmi innuisariaqarput.

Kunngissaq immikkut timmisartorpoq

Kunngissaq sakkutuut timmisartuannik Hercules-imik tikimmat ilaasut saperngusut allat assigalugit mittarfiup illutaanukartinneqanngilaq, toqqaannartumillu Danish Airforces-lip mittarfiup illua'tungaani illuutaanut oqqunneqarluni tassungalu inissinneqarluni, mittarfiup pisortaa Rita Müller paasissutissiivoq.

Ruslandimi Yamalimit aallartitat katillugit qulit Hotel Kangerlussuarmut inissinneqarput.

Timmisartorsuaq kunngissamik timmisartuussisoq nalunaaqutaq 19 sioqqullugu Kangerlussuarmut mippoq. Kunngissap pisortatigoortumik programmia naapertorlugu Nuup mittarfianut tikittussaagaluarpoq nalunaaqutaq 18.45.

Maanna ilimanarsivoq aatsaat sapaatiuppat ualikkut Nuummut timmisartuussisoqarsinnaassasoq.

Programmit allanngorujussuarput

Kunngissap pisortatigoortumik programmia naapertorlugu arfininngorneq tamaat nammineq atugassaraa, taamaakkaluartorli pilersaarutit allanngortinneqassapput, tassa pilersaarutit malillugit kunngissaq sapaatiuppat nalunaaqutaq 12 Ammaanersiornermi peqataasussaagaluarmat unnukkullu Hans Egedep Illuani nereqatigiinnermi Host Citymi peqataasussaagaluarluni.

Silarlunnerali angalaniarnermilu pissutsit pissutigalugit ammaanersiorneq sapaammi unnukkut nalunaaqutaq 20-p tungaanut kinguartinneqarpoq.

Powered by Labrador CMS