Skip to main content

Kunngissaq balkonimiittoq pilluaqquneqartoq

Kunngissaq Frederik arfininngornermi 50-liisoq pilluaqquniarlugu inuppassuit Amalienborgip silataaniipput.

Siullermik ilisarisimaneqarpoq biilinut sukkasuunut nuannarisalittut, pinnersunik arnaateqartartutut matoqqasutullu pissuseqartutut.

Arlallit apeqqusersimavaat Kunngissaq Frederik ullut ilaanni kunnginngornissaminut tulluarnersoq.

Taamaattorli 50-nik ukioqalernini inuttaasunit tapersersorneqarluni arfininngornermi nalliussivaa.

Ritzaup Voxmeter suleqatigalugu innuttaasunik isumasiuititsinerani aperineqartut 81 procentiisa Kunngissap kunngitut tulluunnera imaluunniit tulluulluinnarnera akissutigivaat.

Aperineqartuni 3,7 procentit isumaqarput tulluutinngilluinnartoq imaluunniit tulluuppallaanngitsoq.

Professionshøjskolenimi Absalonimi historikerip aamma adjunktip, Lars Hovbakke Sørensenip, akissutigineqartut tupaallartoqartinngilai.

Taanna isumaqarpoq Kunngissap kunnginngornissani maanna akuerisimarpasikkaa.

- Uppernassuseqarluni kunnginngorniaraanni taava pingaaruteqarluinnarpoq nammineq tassunga upperininnissaq. Tamannalu innuttaasut isiginnittariaasiannut sunniuttarpoq, Lars Hovbakke Sørensen oqarpoq.

Erik Norman Svendsen naapertorlugu kunngissaq nalinginnaasumik ineriartorsimavoq. Erik Norman Svendsen ukioq manna aapriilip aallaqqaataat tikillugu kunngikkormiuni palasiusimavoq. Ilaatigut kunngissakkut katitissimallugit meeraalu kuisimallugit.

- Kunngissap isertuunnikuunngilaa anaanarmi kunngisut kingoraarnissaa uummateqarfigivallaarsimanagu. Kisianni ullumikkut isumaqarpunga maanna piareersimalluinnartoq, aamma malugitittareerpaa piffissaq takkuppat Danmarkimi kunnginngorumaarnini, palasi soraarneq oqarpoq.

LÆS OGSÅ: Takussutissaq: Kunngissaq ima nalliuttorsiutigineqassaaq

Erik Norman Svendsen naapertorlugu kronprinsesse Mary aamma aappariit meeraat sisamat kunngissap ineriartorneranut pingaaruteqarluinnarsimasut.

- Qularutissaanngilluinnarpoq nuliarsimanerata aamma kingorna meeqqiorsimanerata ineritilluinnarsimagaa, soorlu allat ilaqutartaarlutik pimoorussilluinnaraangamik taama pisartut. Tamannalu aamma meeqqaminut sisamanut isumassuilluartarneranut akisussaaffeqarneranullu ilapertuutaaginnarpoq.

Misissuinermi aperineqartut aamma aperineqarsimapput Kunngissap anaanaminut dronningimut sanilliullugu kunnginngoruni akisussaaffik qanoq ingerlatissaneraa ilimagineraat. 57 procentit isumaqarput arnamisut tigusiumaartoq, 26 procentilli isumaqarlutik arnaminit pitsaanerusumik ingerlatsiumaartoq.

Hovbakkeli naapertorlugu nuannarineqarnera qajannarsinnaavoq. Kunngikkormiummi kukkuluttoraangata nuannarineqarnerat appartarmat.

Tamannalu januar 2015-imi maluginiarneqarpoq. Taamani kunngissap anorersuartorsuaq Storebæltsbro politiinit matoqqatinneqartoq biilerluni ikaarpaa.

- Tamatumalu kingorna kunngiitsuuffigorusullutik kissaateqartut amerleriarput. Taamaattumik kunngikkormiut siornatigumut sanilliullugu mianersornerusariaqartut, Hovbakke oqarpoq.

/ritzau/

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER