Kunngikkormiut tikeraarnerat
Kunngissap qitornaasa inuiattut assuutaat ukunanit sananeqarput
Inuiattut assuutit prinsit prinsessillu atugaat tunissutigineqarput. Kommunit sisamaasut tamarmik suleqataapput
Kunngissap nuliatalu meeqqisarlutik nunatsinnut tikeraarneranni maluginiarneqartunut ilaapput prinsit prinsessellu kalaallisuui nunatta immikkoortuinit assigiinngitsunit pisut.
Kalaallisuut taakku Kommune Kujalliup, Kommuneqarfik Sermersuup, Qeqqata Kommuniata aamma Qaasuitsup Kommuniata ataatsimoorlutik tunissutigaat.
Atisat suliarineqarnerat Kakukokamit isumagineqarpoq. Mersortartut mersortarfiillu assigiinngitsut, Kalaallisuuliornermik Ilinniarfik kunngikkormiullu atorfilittaat suleqatigalugit suliarineqarput.
- Taamaalillutik nunatsinni kommunit sisamaasut Danmarkimi kunngikkormiut Kalaallit Nunaanni inuiaqatigiinnut, pinngortitamut ileqqutoqqanullu soqutiginnittuarsimanerannut qujaniarlutik tunissuteqarput, Kanukokap siulittaasua, Martha Abelsen, tusagassiutinut nalunaarummi oqarpoq.
Kalaallisuut assigiinngitsut pingasuupput: Kitaamiut, Tunumiut Avanersuarmiullu assuutaat.
Prins Christianip Kitaamiutut atisai Nuummi mersortarfimmi Kittani suliaapput. Tassani mersortartut tallimat Jonna Kleistimit siulersorneqarlutik atisat suliaraat.
Prinsesse Isabella Tunumiutuunik atisaqarpoq, Taila Ignatiussenip Tasiilami mersortarfimmi Skæven-imi aammalu Kirstine Berthelsenip Sisimiuni Kalaallisuuliornermik Ilinniarfimmi mersugaannik atugaqarpoq - ammit ilinniartut piareersarpaat.
Prins Vincent (Nunatsinni Minimmik taagorneqartoq) Avanersuarmiutut atisaqarpoq Qaanaarmiut Birthe Jensenip aamma Tukummeq Pearyp mersugaannik.
Prinsesse Josephine (Nunatsinni Ivalomik taagorneqartoq) aamma Avanersuarmiutoorpoq Birthe Jensenip aamma Tukummeq Pearyp mersugaannik.