Vestnordisk pris

Kunngi meeqqanut atuakkiaminik nersornaammut innersuunneqartoq

Atuagaq 'Avuu' atuakkiortup nersornaaserneqarnissamut innersuussutigaa

Frederik 'Kunngi' Kristensen aamma Vera-Lise Rosing Olsen

Nunat Avannarliit Siunersuisoqatigiivisa meeqqanut inuusuttunullu atuakkiortumut nersornaasiinissaanut Kalaallit Nunaanni naliliisartut 2016-mi akissarsisinneqartussatut atuagaq ‘Avuu’, Frederik ‘Kunngi’ Kristensenip atuakkiaa toqqarsimavaat.

Meeqqanut inuusuttunullu atuakkiortunut arfineq-pingajussaat akissarsisitsisoqassaaq, akissarsisitsinerlu ukioq allortarlugu ingerlanneqartarpoq. Savalimmiut, Kalaallit Nunaat aamma Islandi tamarmik atuakkamik ataatsimik toqqaasarput.

Aggustimi 2016-mi nersornaammik ajugaasoq toqqarneqassaaq, 60.000 koruuninik aningaasartalimmik.

Naliliisartut arlallit
Nunani taakkunani tamarmik immikkut pingasunik naliliisartoqarpoq, atuakkamik ataatsimik taakku inassuteqartarput.

Savalimmiuni naliliisutut ataatsimiititaliap Hon, sum róði móti ælaboganum (Arnaq, neriusaap tungaanut iputtoq), Rakel Hemsdalip atuakkiaa inassutigaat. Taavalu Islandimi naliliisutut ataatsimiititaliap Mamma Klikk, Gunnar Helgasonip atuakkiaa inassutigaat.

Nunarsuaq takorluugaq
Nukappiaraq 'Avuu' pillugu oqaluttuaq tassaavoq nukappiaqqap nunarsuaq pillugu takorluuineranik imalik, ullut tamaasa nutaanik misigisaqarfiusartoq. Atuagarlu atualerlaanut arfinillit arfineq-pingasullu akornanni ukiulinnut piukkunnartuuvoq.

Atuagaq kalaallisut qallunaatullu allataavoq.

Kalaallit naliliisartut ataatsimiititaliaanniipput Vera-Lise Rosing Olsen, siulittaasoq aamma Erika Nielsen Baadh.

Kaammattuut
Nunat Avannarliit Killiit siunnersuisoqatigiivini meeqqanut inuusuttuaqqanullu atuakkianik akissarsisitsisarnerup siunertaraa, atuakkiorneq tapersersussallugu atuakkiortullu meeqqanut inuusuttuaqqanullu atuakkanik pilersitsinissamut piginnaasaminnik atuinissaannut qiimmassarlugillu kaammattussallugit. Siunnersuisoqatigiinnittaaq malunnartissallugu kissaataavoq, Nunat Avannarliit Killiit tassaammata imminnut ataqatigiiusut.

Atuaruk: Kathrine Rosing nersornaasigassatut innersuunneqartoq

Powered by Labrador CMS