Kulusummi klaverimik ilinniartitsineq iluatsilluartoq

Ukiup affaa qaangiuppoq Nuummi Nipilersornermik Ilinniarfimmit Kulusummiittut ikiorserneqarmata. Klaverit innaallagissamoortut 13-it nunaqarfimmiut meerartaannit nuannaarutigineqaqaat piginnaasaannillu ineriartortitsilluarlutik.

Kitaani Nuummit kangianut Kulusummut pisoqqamik manngertumillu sermersuaqaraluartoq 700 kilometerinillu ungasissuseqaraluartoq Kommuneqarfik Sermersooq akimorlugu nipilersornikkut suleqatigiinneq iluatsittumik pisinnaasimavoq.

Kulusummi klaverimik ilinniartitsisoq Natalie Holm, Nuummi Nipilersornermik Ilinniarfimmut attaveqarpoq, tassami isumassarsisimagami:

- Eqqarsarpunga maani Kulusummi isumalluutitut imminut neqeroorutigissallunga klaverimillu ilinniartitsissallunga. Taamaammat Nuummi Nipilersornermik ilinniarfik attavigaara, ingerlaannarlu taperserpaannga klaverinik ilinniartitsinissamullu aningaasaliillutik.

- Meeqqat inuusuttullu klaverimik nipilersornissamut sivisuumik soqutiginnissimapput. Maannamut klaverinik innaallagissamoortunik marluinnarnik peqaraluarpugut, nutaamilli iliuuseqarneq pisinnaasimanavianngikkaluarpoq Nuummi Nipilersornermik ilinniarfik ikiuussimanngitsuuppat. Taamaasilluta iluatsitsisupilussuuvugut.

Klaveri angerlaallugu atortarpaat
Klaverit inaallagissamoortut siorna oktobarimi tikisinneqarput. Taamanili Natalie Holmip atuartut katillugit 12-it immikkut tamaasa nal.akunnerata affaani sapaatillu akunneri tamaasa ilinniartittarpai.

Assigiinngissut annertoqaaq, siornatigummi sunngiffimmi ilinniartitsisoqarallarmat atuartut arfineq-pingasut ataatsikkut ilinniartinnissaat kisimi periarfissaasimagaluarpoq.

Pitsaaqutaali uaniippoq maanna atuartut klaverimik innaallagissamoortumik angerlaassillutik atuisinnaalernerat.

- Periarfissatsialassuuvoq pitsaaqutaasorujussuullunilu. Ilinniagassaminnik angerlaassisarput sapaatip akunnera tamaat sungiusarsinnaasaminnik. Sapaatip-akunneranut akunnerup affaannaanik ilinniartitsinissamut periarfissaqaraanni ilinniartitsinerillu avataasigut periarfissaqarnani, ilikkariikkat tullissaanut puigortoortaratsigit.

Nipilersornermik ilinniartitsisup ineriartorluarneq takusinnaavaa.

- Takusinnaavara sukkasuumik siuariartuutigigaat. Nuutit ilinniarpaat, nipit tulleriinneri, akuttoqatigiissaarineq, assaat inuaat eqqortut atorsinnaallugit assaallu illutut atorsinnaallugit. Timip avataasa aalatinnissaanut ineriartuutigivaat, rytmikkimut, eqqaamaniarnermut soorunami aamma nipilersorsinnaanerminnut. Allanilli peqateqarsinnaanerminnut aamma ineriartuutigaat. Atuartut minnerit annerillu assigiinngitsorujussuarnik qaffasissusilimmiipput takusarparalu angisuut minnerit klaverimik ilinniartikkaat, Natalie Holm oqaluttuarpoq.

Klaverernermut atuartut Natalie Holmi peqatigalugu maajimi tusarnaartitsinissaminnut piareersaleruttorput. Taamanikkussamut nipilersornermut atuartut tusarnaarianut ukiup affaani ilinniarsimasatik tusarnaartittussaavaat.

Nunaqarfimmiut tamarmik qaaqquneqareerput, aaqqissuussamilu klaverertoqassaaq, erinarsortoqarluni qitittoqarlunilu.

Kulusuk pillugu allaaserisat tamaasa atuakkit