Kulusumi atuarfik qitittartunit pulaarneqartoq
Qitittartoqatigiit 'Evoke' Kulusuk tikeraarpaat, nunaqarfiullu atuarfiani atuartut qitinnermik ilinniartinneqarput.
Atuartut aamma inuusuttut 6-21-illu akornanni ukiullit qitittariaatsinik assigiinngitsunik misiliinissaminnut periarfissaqartinneqarsimapput: ballet, hip hop, nutaaliaasumik qitinneq, uaajeerneq aamma kalattoorneq. Kulusumi atuarfimmi ilinniartitsisoq, Natalie Holm taama ilisimatitsivoq.
- Qitinnermi timi qitittartutut atorneqarnera atuartunut nuannerpoq, unammillernarluni aamma ilikkarfiuvoq. Qitittartut atuarfimmi atuartut pitsaasumik misigisaqarfigaat, qitinnermut sungiusarnermut peqataasut amerlallutillu assigiinngitsunik qiteriaatsinik misiliinissaminnut soqutiginnittorujussuullutik. Kulusummi atuarfik pikkorissunik meeraateqartoq qitittartut oqaluttuaraat, taakkulu qitinnermi pissuserissaarsimapput, ilinniartitsisoq allappoq.
Takutitsinerit marluk
Qitinnikkut maluginiutit tamaasa ineriartortinnissaannut, nutaaliorsinnaaneq, misigissutsit, oqaaseqanngikkaluarluni eqqarsartaatsimik allannguineq, timi atorlugu anniaatinik nuannaarnermillu oqaluttuarnissamut periarfissaqartoq, Natalie Holmip erseqqissaatigaa.
- Qitinneq peqqissarneruvoq, timimut tarnimullu peqqinnarpoq, ilinniartitsisoq oqarpoq.
Qitilluni sungiusartitsineq qitilluni takutitsinernik marlunnik naammassineqarpoq.
- Qitittartunut qitinnermik nipilersornermillu misigisanut nuannersunut qujarujussuarniarpugut. Neriuppugut Kulusumut tikeqqikkumaartut.