se billeder
Kulturisiornermi anorersuanngilaq
Narsami unnummi kulturisiorfimmi sila ´kulturilittut´ pissusilersorpoq
Arfininngormat unnukkut avanna-kanannamik anorersuassangatinneqaraluarpoq, nillertumilli anoraasuallattaaginnarpoq, Narsamilu unnummi kulturisiorfimmi amerlaqisut unnummi neqerooruterpassuarnik takuniaapput.
Qatserisarfimmi meeqqat biilini qatserutini issianeq misilippaat, innermillu qatserinermik takutitsisoqarpoq qatserisarfiullu atortui takutinneqarlutik.
Napparsimmavimmi peqqissuseq misilinneqarsinnaavoq oqimaalutartilluni, aap naqitsinera uuttorlugu kiisalu sukkornermut misilitsilluni.
Eqqumiitsuliornermik sannavimmi Muku-mi illoqarfimmi eqqumiitsuliortut unnussioqatigiipput. Aamma meeqqeriviit, ilaqutariit illuat atuakkanillu atorniartarfik soqutiginnittunut ammapput.
Aammalu kulturip innuttaasullu illuanni A21-mi illoqarfiup assiliisua assilisaminik nutaanik saqqummersitsivoq, Narsamilu katersugaasiviup pisortartaava, oqaluttuarisaanermik ilisimatooq Jesper Stormly Enevoldsen akustiske guitarimik aliikkusersuivoq, kaffillerluni kageerallerlunilu.
Katersortarfimmi kalattoortoqarpoq erinarsoqatigiinnillu erinarsortoqarluni. Inuussutissalerinermik ilinniarfimmi Inuili-mi ilinniartut nerisassiaminnik assigiinngitsunik misiliititsipput, politiillu atortutik qanorlu atornissaat takutippaat.
Nalunaaqutaq 19 aamma 21 akornanni ingerlatsivippassuit suliffeqarfippassuillu ammapput, tamaviisa takuniassagaanni angumeriuminaalluni. Inuppassuilli aneerput nuannisarlutillu.