Sermersooq

Kulturikkut nittarsaassisutut toqqaasoqartoq

Nipilersoqatigiit Sume pillugit piviusulersaarusiortoq Kommuneqarfik Sermersuumit kulturikkut nittartaassisuusutut toqqarneqarpoq

Kulturikkut nittarsaassisutut toqqarneqartoq, eqqumiitsuliortoq filmiliortorlu, Inuk Silis Høegh

Filimiliornermi ilitsersuussisoq assilialiortartorlu Inuk Silis Høegh Kommuneqarfik Sermersuumi kulturikkut nittarsaassisutut toqqarneqarpoq arfininngormat.

Tamanna pivoq Nuuk Kunstmuseumimi aaqqissuussisoqarneratigut.

Kulturikkut siuarsaanissamik siunnersuisoqatigiit ukioq manna kulturikkut nittarsaassisoq toqqarpaat tamatigoortuunera, pikkorilluinnartuunera suliaminullu maniguuttuunera pissutigalugu.

Kulturikkut siuarsaanissamut siunnersuisoqatigiinni siulittaasup Asii Chemnitz Narupip oqalugiarnermini kulturikkut nittarsaassisunngortoq titartakkamut Asteriximut assersuuppaa, taannaammat sorsuttartoq silatooq, qanorluunniit ajornakusoortoqartigigaluaraangat tunuarsimaarneq ajortoq.

Inuk Silis Høegh Det Kongelige Danske Kunstakademimi ilinniarsimasuuvoq aammalu Tuluit Nunaanni Bristolip Universitetianit kandidatitut soraarummeernikuulluni. Siorna filmi Sume ilitsersuisuuffigigamiuk Nunatsinni ilisimaneqarlualerpoq, nunarsuarlu tamakkerlugu naliliisartunit nersualaarneqaqaluni.

- Inuk Silis Høeghip eqqumiitsuliornerminut peqatigitillugu nunatsinni ataatsimoornerulersitsisoqarsinnaanera takutippaa, nunarput komunilu taamaasilluni pitsaasumik maluginiagassanngortillugit. Taamaattumik kulturikkut nittarsaasutut toqqarneqarnera tulluarluinnartutut isigaara, Asii Chemnitz Narup oqarpoq.

Ukioq manna ukiut sisamassaa Kommuneqarfik sermersuumi kulturikkut nittarsaassisumik toqqaasoqarpoq, siullermeertumillu angummik toqqaasoqarluni.

Powered by Labrador CMS