lokalhistorisk
Kulturikkut eriagisat Nuummut angerlaanneqartut
Suleqatigiisitaq piffiup oqaluttuarisaaneranik katersugaasiviliornissamut pilersaarusiorluni naammassivoq. Nutaamik sanaartortoqassappat tamanna akisussaaq – ilami akisoorujussuussaaq. Taamaammat periarfissat allat aamma innersuussutigineqarput
Kvadratmeterimut 27.500 kr. Saniatigullu aningaasartuutit allat.
Imaluunniit 500 kvadratmeterisut angitigisumut 13,7 mio. kr-iliineq.
Nutaamik piffimmi oqaluttuarisaanermut katersugaasiviliornissaq taama akeqassaaq, taamaammallu suleqatigiisitap kommunimit pilersinneqartup pingaarnersiuilluni allattuiffiliaani, nutaamik sanaartornissaq pingaarnerit »pingajuattut« inissippoq.
Suleqatigiisitamit Nunatta Katersugaasivianit, Peqatigiiffimmit Nuummi Eqqaamasanit kiisalu kommunip ingerlatsiveqarfianit inuttaqartumit
periarfissat pingasut tikkuarneqarput. Katersugaasivik Nuutoqqami illumi, soorlu napparsimavitoqqami pilersinneqarpat pitsaanerpaassasoq suleqatigiisitaq naliliivoq.
Qatanngutigiinniat illorsuat pingaarnersiuinermi tulliutinneqarpoq, pingajuattullu nutaamik sanaartorneq, imaluunniit illumik pioreersumik iluarsartuussamik, ilasamilluunniit sananissaq tikkuarneqarpoq.
Kulturikkut eriagisat
Piffimmi oqaluttuarisaanermut katersugaasiviliornerup kinguneranik kulturikkut eriagisat, ullumikkut nunani allani katsersugaasivinniittut, toqqorsivimmiittullu angerlaanneqarsinnaanerannut periarfissap annertunerulernissaa pitsaaqutinut ilaavoq.
Suleqatigiisiaq nalunaarusiami pineqartoq pillugu ima allappoq: – Katersugaasivik »qaffasissumik pitsaassuseqarpat«, katersat piffissap ingerlanerani nunatsinnit anninneqarsimasut, nunatsinnut oqquteqqinneqarsinnaalissapput. Nunarsuarmi katersugaasiviit taama soqutiginninnertik takutissimavaat.
Kommunip aningaasaqarnermut ataatsimiititaata katersugaasivimmik pilersitsinissami aaqqissummik sorlermik toqqaanissaa, katersugaasivissaq pillugu suliami tulliussaaq.
Tamatumalu peqatigisaanik suleqatigiissitap suleriaqqinnissaani suliakkiissutissaq politikikkut aalajangiisoqassaaq.