Nuuk Nordisk
Kulturfestival-mi projektleder-iunnaartoq narrutsassimavoq
Nuuk Nordisk kulturfestival-nissaq sapaatit akunneri arlaqanngitsunnguanngortullu Rickard Borström-p peqataatinneqarunnaarnini ajuusaarutigaa.
- Oqaloqatigiinneq uummarissoq ineriartortitsisorlu anguniarlugu sulerulussimavunga. Festival-p pilersaarusiornissaa pimoorussamik eqqumiitsulianillu assigiinngitsunik imaqarnissaa anguniarlugu kalaallit, nunani avannarlermiut, nunat assigiinngitsut akornanni najugallit, suliffeqarfiit sulisorpassuillu oqaloqatigisarsimallugit, Rickard Borgström Sermitsiaq.AG-mut taama oqarpoq.
Programmi pitsassuaq
Taassuma oqaluttuaraa Nunatta Isiginnaartitsisarfia suliamut pinngitsoorneqarsinnaanngitsumik tapersersuisimasoq, taakkualu suleqataalluarnerisigut festivalip ingerlanneqarnissaanut programmi pitsassuarmik suliarineqarsinnaasimasoq.
- Nunani tamani ilisimaneqartoq qittatinik ilusilersuisartoq suleqatigalugu maanna isiginnaartitsisartunngorniat qitimmik meeqqanut takutitsisinnaanngussapput. Tamannalu Isiginnaartitsisartunngorniarfik oqaloqatigisarneratigut pilersinneqarsinnaasimavoq, Rickard Borgström taama oqarpoq.
Pimoorussineq annertooq
Taassuma suliffeqarfiit assigiinngitsut isumassarsianut assigiinngutsunut pimoorussillutik sulisimanerat nersualaarpaa, ilaatigut Ilisimatusarfik, Nuuk Kunstmuseum, Nunatta Atuagaateqarfia, Nuummi meeqqat atuarfii, GU, Katuaq kiisalu Nuummi nipilersortartut suleqatigiinnermikkut inerititaqarsimanerat tikkuarlugu.
- Sumiiffimmi isiginnaartitsisartut, nuannersumik suleqatigisimasama, festivalprogrammip naammassinissaa pimoorullugu sulissutigisimavaat. Suleqatigiilluarsimanitsunnut ilanngussaannullu pingaaruteqaqisunut uummammit pisumit qujaffigerusuppakka, taanna oqarpoq.
- Qujamasuutigaara Kalaallit Nunaanni sulisinnaatitaasimagama, suliakkalu aamma qujamasuutigalugit. Isumassarsinarsimaqaaq ilinniarfiullunilu, Nuummilu suleqqilernissannut qilanaarpunga.
Tunuarnini pillugu
Naggasiullugu Rickard Borgström ima oqarpoq:
- Kattuffimmiit allamik periarfissinneqarnanga suliama allamut ingerlateqqiinnarnissaannut aaliangiisoqarnera ajuusaarutigaara.
Nuuk Nordisk Kulturfestival oktoberip 16-niit 21-at ilanngullugu ingerlanneqartussamut Kommuneqarfik Sermersooq Nordens Institut-lu aaqqissuisuupput.