Kukkusoqarsimaneranut nassuerutiginnittoqarnera Naajap nuannaarutigaa

- Nuannerpoq Vittus Qujaukitsoq, Aningaasaqarnermut Naalakkersuisoq, piluusaarluni nassuermat oqaatsinut inatsit sualuttumik paasisimagini.

Inuit Ataqatigiit tunuliaqutaralugit Inatsisartunut ilaasortaq Naaja Nathanielsen oqarpoq.

Naalakkersuisummi piumasaqarnikuugaluarput Namminersorlutik Oqartussat suliariumannittussarsiuussisarneranni suliffeqarfiit neqerooruteqarumasut qallunaatut saaffiginnittassasut. Tamanna aamma atuuppoq neqeroortitsinermi atugassat pillugit aperiniarluni saaffiginnissagaanni.

- Ingerlatsineq taama ittoq inerteqqutaananilu naleqquttuusoq Naalakkersuisut uannut siusinnerusukkut akissuteqarnerminni aalajangiusimanikuugaluarpaat.

Kisiannili tassa ullumi Vittus Qujaukitsoq nassuerpoq oqaatsinut inatsisip siunertai akerlilerlugit Naalakkersuisut paasinnittarsimasut, Naaja Nathanielsen oqarpoq.

Naaja Nathanielsenip Vittus Qujaukitsup oqaasii uku unuannaarutigai:

'Naak inatsimmut oqaaseqaatit naapertorlugit oqaatsinik atuinissamut aalajangersakkanut tamakkiisumik ataasiinnarmillu paasinninnissamut ajoraluartumik tapiinngikkaluartut inatsimmut piareersaatit misissoreerlugit tamanna tunngavigalugu ima paasineqartariaqassaaq, tassalu suliami danskisuinnaq saaffiginnittoqarnissaanik piumasaqarnissaq oqaatsinut inatsisip siunertaanut naapertuutinngitsoq.

Naalakkersuisut taamaammat ingerlatsivinni tamani danskisuinnaq saaffiginninnissamut piumasaqartarunnaassaaq.'

Nassueruteqarnera nuannerpoq

- Akissutisiara kingulleq assut nuannaarutigaara. Pissutigalugu pisortanut saaffiginnissagaanni qallunaatuinnaq oqaluttarnissamik piumasaqarneq inuiaqatigiinni equnganermik pilersitsisinnaammat, kamammik avissaartuunnermillu nassataqartumik.

- Maanna erseqqissarneqarpoq innuttaasut tamarmik pisortanut saaffiginnissinnaasut kalaallisut qallunaatulluunniit ilitsoqqussaralugit oqaaseqarnertik apeqqutaatinnagu. Tassa taamaassaaq. Nunaavugut ajunngitsut ajortullu assigiimmik atortillugit arlariinnik oqaaseqarfiusoq, tamannalu naapertussavarput piviusumik inuunitsinni. Aamma inuk kinaluunniit oqaatsit pissutigalugit inuiaqatigiinni inooqataanissamut mattunneqartariaqanngilaq. Pisariaqartipparput nukiit eqiternissaat, assigiinngisitsinernik pilersitsiortorata, Naaja Nathanielsen oqarpoq.