sprogfest
Kukkuniiaatip nalliuttorsiornerani kaffisortitsineq
Kukkuniiaat ukiuni qulinngortorsiorpoq
Naak aatsaat ukiuni qulinngortorsioraluarluni, Kukkuniiaat maanna ineriartorluarsimalereerpoq.
Taanna ukioq 2006-imi Oqaasileriffiup saqqummersippaa. Taannalu ineriartorluarpoq, ukiullu tulliani Kukkuniiaat 2.0 piareerneqarpoq. Kukkuniaallu 3.0 2013-imi piareerneqarpoq.
Oqaatsit tamangajaasa kukkuniiarsinnaagai
taassuma kalaallisut allatat 95 procentii sinnerlugit kukkunersiorsinnaavai, tassa pitsaassutsimigut oqaatsit allat assigalugit qaffasissuseqarpoq. Kukkuniiaat 3.0 MS Windows 2000-imit, Windows 7-imit, Windows XP-imit MacIndesignimillu akeqanngitsumik atorneqarsinnaavoq.
Oqaasilerissutit assigiinngitsut
Ukiut ingerlanerini Kukkuniiaat allanik ilalersorneqarpoq, soorlu oqaatsinik ataasiakkaanik oqaaseqatigiinnillu misissueqqissaarutit, allattaasitoqqamiit allattaasitaamut nuutsissut, nipisiuissunngortitsissut, qarasaasiakkut kalaallisut atuffat.
Atuaruk: Qarasaasiat kalaallisut atuffassisinnaanngussapput
Oqaatsitigut teknologi pingaartoq
Oktobarip 20-anni Oqaasileriffik Ilimmarfimmi kaffillerlunilu kaagillernerniarpoq. Tassani aamma oqaatsit ineriartorneranut teknologii nutaaq sooq pingaaruteqarnersoq oqaluttuariniarpaat.
Atuaruk: Ilitsoqqussaralugu oqaatsit ulluat malunnartinneqassaaq
- Taamaammat ullumikkut oqaatsit suulluunniit ataannassagunik teknologimik ilalersorneqartariaqarput, minnerunngitsumik siunissami pisariillisaataasumik pitsaassutsimik qularnaarinneqataassammata, kiisalu aningaasanik sipaarutaassammata, Oqaasileriffik qaaqqusissummini allappoq.
Atuaruk: Nivi: Tuluttoornerup utaqqisinnissaanut akissaqanngilagut
Tamatuma saniatigut aamma ulluni makkunani eqqartorneqartut ilaat pillugu saqqummiisoqassaaq, tassa qallunaatoortarnerup tuluttoornermik taarserneqarnissaanut suut iliuuserineqartariaqarneri pineqassapput.