naatsorsuutit
Kukkunersiuisoq: Sermersuup naatsorsuutaani kukkunerit amigaatillu arlallit
Kommuneqarfik Sermersuup ukiumoortumik nalunaarusiami tunniussimasaani, suliffeqarfiup kukkunersiuisartup Deloittep aammaarluni kukkunerit amigaatillu arlallit uparuartariaqarsimavai. Arfineq-pingasunik oqaaseqaateqartoqartariaqarsimavoq. Taakku siornatut amerlatigipput.
Deloittep siornatigut oqaaseqaatigisani oqaatigeqqittariaqarsimavai, arfineq-pingasunilu kommuni suli naammassinnissimanngitsoq paasinarsivoq.
Taamaattoq siuariartortoqarpoq
Kukkunersiuisulli paasinnittaasiat naapertorlugu, ''kommunip aaqqeeqqinnissamik pilersaarummik akuersineratigut suliniutit pisariaqartut aallartinneqarput qulakkeerniarlugu, kukkunersiuisut oqaaseqaataat periarfissami qaninnerpaami aamma naammaginartumik naammassiniarneqassasut ingerlaavartumik suliniuteqarnikkut''.
- Soorunami ajuusaarutigeqaara ukioq manna kukkunersiuisut oqaaseqaataasa ikileriannginnerat, taamaattorli kukkunersiuisut oqaaseqaataannit erserpoq suliassaqarfinni tamaginni siuariarsimasugut, suliassaqarfiilli ataasiakkaat arlaqartut siuariarfigissallugit amigaatigaarput. Tamannalu tunngavigalugu kukkunersiuisut oqaaseqaatitik ukioq manna ikilisissinnaanngilaat, kommunimi pisortaaneq Lars Møller-Sørensen taama oqarpoq.
Kommunip nittartagaa naapertorlugu borgmester Asii Chemnittz Narupip qullersat ukioq manna oqaaseqaataasunut kingullernut akiitsunut akiliinissamut pilersaarummik saqqummiusseqqusimavai.
Uani kukkusoqarpoq
Isornartorsiorneqartut arfineq-pingasut ukununnga tunngapput:
- Atuisut akiliutaannik akiliisitsiniaanermi suleriaatsit allaaserineqarnerat amigaataasoq
- Akissarsialerivimmi amigaatit
- Aningaasaliissutinik eqquutsitsineq
- Aqutsisut suliamut nakkutilliineranni amigaatit
- Kalaalimineerniarfiup naatsorsuutai
- Sanaartornermi naatsorsuutinik il.il. saqqummiussineq
- Peqquserluttuliornermik assigisaanilu suliani suleriaatsini sanngeequtit
- IT-mik nakkutilliinerni nalinginnaasuni sanngeequtit aamma amigaatit