Aleqap atornerluinera
Kukkunersiuinermut Ataatsimiititaliaq: Aleqap landskarsi kassekredit-imisut atorsimavaa
Inatsisartut Kukkunersiuinermut Ataatsimiititaliaata apeqqutaa, tassa Naalakkersuisunut ilaasortat allat landskarsi kassekredit-itut atortarneraat, Aleqa Hammondip akissuteqarfiginngilaa - aammalu akissuteqarfiginagu aningaasanik amerlajaanik akiligassaqalerluni paasigamiuk sooq akilersimanngikkini
Naalakkersuisut siulittaasuata Aleqa Hammondip, Siumumeersup, nassuerutigaa landskarsi nammineq kassekredit-imisut atorsimallugu, tassungalu akiitsuni akilersorini, Inatsisartut Kukkunersiuinermut Ataatsimiititaliaanik allaffeqatigiittarsimanermi takuneqarsinnaavoq. Taassuma utoqqatsissutigaa malittarisassat ilisimasimanngikkini, Siulittaasup Naalakkersuisoqarfiata suliassat paamaaruppallaarsimagai aammalu Kuupik Kleist taamaasiorsimasoq.
Erseqqissaavorlu aningaasat tamarmik akilerneqareersimasut.
Aningaasat ilaatigut atorneqarsimapput siorna ernissaata apersortinnerani Hans Egedep Illuani taassuma nalliuttorsiutigineqarneranut. Tamatumani namminersorlutik oqartussat 10.705 koruuninik akiligassinneqarsimapput.
Tamatuma saniatigut landskarsip aningaasaatai atorneqartarsimapput ilaqutariit angalanerannut, akunnittarfimmiinnerannut minibarimillu atuinermut ilaalu ilanngullugit. Akiligassat katillugit 106.363.27 koruuniupput.
Kukkunersiuinermut Ataatsimiititaliaq septembarip 15-ianni Aleqa Hammondimut allagaqarpoq nassuiaateqaqqullugu qinnuigalugu.
Aleqa Hammond septembarip 245-anni akissuteqarpoq, tamatumani uppernarsarlugu piffissami 2013-imi maajip 28-anniit 2014-imi maajip 1-annut aningaasat pineqartut akiligassarilersimallugit.
Aleqa Hammond nassuiaavoq ukioq manna aatsaat juunip aallaqqaataani akiligassami amerlassusaanik paasitinneqarsimalluni, aningaasallu septembarip 8-anni akilersimallugit.
Kukkunersiuinermulli Ataatsimiititaliap akissutit tamanna naammaginngilai septembarillu 26-anni - tassa tallimanngormat - ilaatigut allalluni tupaallaatissaanngitsoq naalakkersuisup landskarsi nammineq kassekredit-imisut atorsinnaanngikkaa.
Tamatuma saniatigut Kukkunersiuinermut Ataatsimiititaliap paaserusuppaa 2013-imi maaji sioqqullugu atornersuisoqarsimanersoq.
Kukkunersiuinermut Ataatrsimiititaliap aamma paaserusuppaa Naalakkersuisunut ilaasortat allat landskarsi namminneq kassekredit-imisut atortarneraat.
Allaqatigiittarnertigut (allaaserisap talerpiani allakkat takukkit), kukkunersiuinermut ataatsimiititaliaq ilanngullugu aperivoq qaammammut 5.000 koruuninik akilersuisarnissaq qanoq aaqqinneqarsimanersoq, aammalu siulittaasoq sooq amerlanerusunik akilersuinngitsoq nalunagu akiligassat taama amerlatigisut.
Tassami Kukkunersiuinermut Ataatsimiititaliap apeqquterpassuisa ilai, Akeqa Hamnmondip tallimanngormat allakkamini suli akissutigeqarfigisimanngisai.