Aleqap atornerluinera
Kukkunersiuinermut ataatsimiititaliami siulittaasoq taamaammat oqaaseqarusunngilaq
Inatsisartut Kukkunersiuinermut ataatsimiititaliaata ataasinngornermi suna ataatsimiissutigineqarsimanersoq Kristian Jeremiassenip oqaatigiumanngilaa. Suleriaaserineqartoq innersuunneqarpoq
Inatsisartut Kukkunersiuinermut ataatsimiinnerat pillugu suna ataatsimiissimanersut pissanngatigineqarpoq.
Ataatsimiinnermiilli oqallisigineqartut isummiunneqartullu innuttaasut paasitinneqarnavianngillat.
- Ataatsimiinngilaataa oqaatigisakka oqaatigeqqissavakka. Ataatsimiititaliami ataatsimiinnermit oqallisigineqartut matoqqasuupput, Kukkunersiuinermut Ataatsimiititaliami siulittaasoq Kristian Jeremiassen oqarpoq.
Naalakkersuisut siulittaasuata Aleqa Hammondip nunatta karsianit 106.363,27 koruuninik atornerluisimanera pillugu ataatsimiissimasut Sermitsiaq.AG paasitinneqarpoq, ataatsimiinneq nalunaaqutaq 12.00 aallartippoq.
Ataatsimiititaliami tamanna oqallisigineqarsimanersoq oqaaseqarusunngilaq.
Ataatsimiinnermi allatsip Kasper Juul-Nielsenip uppernarsarpaa ataatsimiititaliami ataatsimiinneq tamanut saqqummiuteqqusaanngitsoq. Inatsisartut suleriaaserisaanni kapitalit sisamaat innersuuppaa, imalu allaqqasoqarpoq:
§ 13. Ataatsimiititaliami oqaluuserineqartut tamanut tusarliunneqaqqusaanngillat.
Imm. 2. Ataatsimiititaliarli aalajangersinnaavoq nalunaarutit aalajangersimasumik annertussusilerlugit killilikkat tamanut tusarliunneqarsinnaasut.
Ataatsimiititaliap siulittaasuata Kristian Jeremiassen ataatsimiinnertik pillugu oqaaseqarusunngimmat taamaasilluni aamma tamanut tusarliunneqanngilaq ataatsimiinneq sumut tunngasimanersoq.
Aleqa Hammondip nunatta karsianit atuisimanera tallimanngormat tusarliunneqarpoq. Kukkunersiuinermut ataatsimiititaliap tamanna tusarliuppaa, suliap imaannaanngitsuunera pissutigalugu.