Aleqap atornerluinera

Kukkunersiuinermut ataatsimiititaliami ilaasortat ataatsimeeqqissapput

Inatsisartut Kukkunersiuinermut ataatsimiititaliaanni ilaasortat nalunaaqutaq 12.00 ataatsimeeqqissapput

Kukkunersiuinermut ataatsimiititaliap siulittaasua, Siumumeersoq Kristian Jeremiassen

Aleqa Hammondip landskarsimit 106.363,27 koruuninik aningaasanik atornerluisimanera pillugu Inatsisartut Kukkunersiuinermut ataatsimiititaliaat nalunaaqutaq 12.00 ataatsimiinnermi sammineqassagunartoq Sermitsiaq.AG paasitinneqarpoq.

Ataatsimiititaliap siulittaasuata Siumumeersup Kristian Jeremiassenip ataatsimiittoqartussaanera Sermitsiaq.AG-mut uppernarsarpaa.

- Ataatsimiititaliami ataatsimiinnerit matoqqasumik ingerlanneqartarput. Ataatsimiititaliami suna ataatsimiissusitigineqassanersoq avammut tusarliussinnaanngilara, Kristian Jeremiassen oqarpoq.

- Kingusinnerusukkut sianersinnaavutit, ataatsimiititaliap siulittaasua oqarpoq.

Aningaasanik atornerluisoqarsimanera annertungaarmat ataatsimiititaliami ilaasortaasut pingaartissimavaat tamanna Inatsisartunut ilaasortanut nalunaarutigissallugu. Tamanna septembarip 26-ani tallimanngornermi pivoq. Tallimanngornerup unnukkuani aamma tamanna tusagassiutitigut tusarliunneqarpoq.

Powered by Labrador CMS