Kukkuneq Arctic Prime naatsorsuutaanut millionilikkuutaanik naleqartoq
Arctic Prime Fisheries 2013-ip ingerlanerani umiarsuaatimik nalinganik kukkuluttorsimanertik 2017-imi paasivaat. Tamanna ingerlatseqatigiiffiup aningaasaateqarneranut millionilikkuutaanik sunniuteqarpoq.
Qaqortumi ingerlatseqatigiiffik Arctic Prime Fisheries ulloq 4. juli ukiumut naatsorsuutit marlunnik nangaanartunik imaqartoq akueraat.
Kukkunersiunermi-nangaanartut
Kukkunersiuisarfik pisortanit akuerisaq Deloitte naatsorsuutini 63 millioner koruunit akileraarutigineqartussanngorsimasut pillugit nangaassuteqarpoq.
- Ulloq 31.12.2017 63 millioner koruunit akileraarutigineqartussatut naatsorsugaapput. Akileraarutissat ukiut tallimat ingerlanerini tamakkerlugit akilerneqarsinnaanerat pillugu uppernarsaammik tigusaqarsimanngilagut, taamaammat taakku nalingat nangaanartoqartipparput, kukkunersiusartoq Allan Pedersen Deloitteminngaannersoq allappoq.
Deloitte Arctic Prime naatsorsuutaanik aatsaat kukkunersiuivoq. Paasinarsivorli 2015-imut 2016-imullu naatsorsuutini kukkunersiuisuusimasup millionit taama amerlatigut aamma oqaatigisimangai.
12 millioner koruuninik sinneqartoorneq
Ukiumut angusat 2016-imi 21,87 millioner koruuninik amigartooruteqarnermiit 2017-imi 12 millioner koruuninik sinneqartoorfiulersimavoq. Aqutsitut naapertorlugit ukioq manna isertitassatut ilimagineqartut ukiuni tulliuttuni angusariumaakkanut pitsanngorsaataajumaarput.
Taamatut angusarissaartoqarnissaa ilimanaateqartillugu , 2013-imi umiarsuup kukkuluttorluni nalilerneqarsimanera, Malakias J. D. Andreassenip ugguaatigissavaa.
Naatsorsuutini allassimavoq, ukiumut naatsorsuutini 2016-imi 2017-imilu sunniutaasimasut aaqqiivigalugit naatsorsuisoqarsimasoq.
Nammineq aningaasaatit sunnerneqartut
Kukkuluttornerup kingunerisaanik 2016-ip aallartilaarnerani nammineq aningaasaaatit 31,899 millioner koruuninik ikileriaateqarput 2017-illu naalernerani nammineq aningaasaatinut 24,541 millioner koruuninik kinguqarluni. Ingerlatseqatigiiffiup umiarsuaatiminik naliliinera 2017-ip naanerani 36 millioner koruuninik naleqarsimasoq, allassimavoq.
Taamaalilluni 2017-imut naatsorsuutini nammineq aningaasaatinut 165 millioner koruuninik amingartooruteqarfiuvoq.
Sulisut ikinnerulersimasut
Aalajangersimasumik sulisut 2017-imi 147-iupput ukiup siuliani 157-usimallutik.
Aqutsisut paasissutissiaraat, ingerlaseqatigiiffik aalisarnermik aalisakkerinermik taakkunanngalu Kalaallit Nunaanni niueruteqarnermik aallutaqartoq.
Siulersuisuni ilaasortaapput Gudmudur Kristjansson, Jónas Engilbertsson, Jørgen Wæver Johansen, Malakias Jens Daniel Andreassen aamma Robert Møller.