Kujataani tuberkuloserneq atugaasoq

Peqqinnissaqarfiup takussutissat maluginiarneqarnissaat kaammattuutigaat

Tuberkulose Kujataani annertuuimk ajornartorsiutaavoq. 2014-iminngaanniit Kujataani innuttaasut akornanni tubrkulosemik nappaateqalertartut amerlasuut naammattoorneqartarsimapput.

- Tuberkulose tuniluuttarpoq bakteriamik najuussuisoqarnerani, taamaattumillu
eqiluinsaarnissaq pingaaruteqarluinnarpoq ersiutaasinnaasunillu atuisoqartillugu
misissortittoqartariaqartarluni. Qanimut attaveqartarnikkut nappaat tuniluutipallattarpoq, taamaattumik ilaqutariit, kammagiit, suleqatigiit inuiaqatigiillu iluanni nappaat sukkasuumik tuniluutipallassinnaasarluni. Taamaattumik ersiutaasinnaasunik malugisaqartoqartillugu
misissortipallattoqartariaqartarpoq kajumissaasoqartassallunilu, Nakorsaaneq, Henrik L.Hansen taamak nassuiaavoq.

Tuberkulose pillugu

Tuberkulose nappaataavoq bakteriamik Mycobacterium Tuberculosisimit aallaavilik. Tuberkulose
nunarsuarmi toqqutaasartut annerpaat qulit ilaanniippoq.
Bakteria nalinginnaasumik puanniittarpoq, kisiannili aamma timimi allamiissinnaasarpoq soorlu saanini qinersinilu. Tuberkulose puammiittoq kisimi tuniluuttarpoq
Tuberkulose puammiitsilluni tuniluuttariaasigivaa, inuk nappaammik pigisalik quersornermini bakterianik aniatsitsisarnera, eqqaaniittullu anersaartoraangamik bakterianik najuussuisarlutik. Bakteriat meterip
iluani ingerlaariaaseqarput. Nappaammik tunillatsittut quliugaangata ataaseq kisimik
tuniluussisinnaalertarpoq. Qulingiluat kingulliit malugisaqarneq ajorput tunillaasinnaanerlu ajorlutik.
Imerfimmik, cigarettimik/pujortaammilluunniit aveqatseqatigiikkaanni Tuberkulosemik
tunillanneqarsinnaaneq navianartorsiornerusarpoq.

Tigulaarinniffik: Peqqinnissaqarfik

Kalaallit Nunaanni Tuberkulosemik nappaateqarneq 1950-ikkunninngaanniit 80-ikkut qeqqata tungaanut ammuinnaq ingerlasimavoq. Tamannalu anguneqarsimavoq akiuussutissanik kapisisoqartarsimanera, aallaaviusunik ujartuisoqartarsimanera kiisalu nappaatip pinaveersaartinneqartarsimanera. Tamassumali kingorna nappaatip nalaanneqartarnera qaffakkiartuaaqqilersimavoq, taamaattumillu pinaveersaartitsisoqarnissaa suli pisariaqartinneqarpoq Kalaallit Nunaanni nappaatip atugaanera 2010-miit ammut ingerlaqqilersimavoq, nunarsuarmulli sanilliussissagaanni suli nappaammik nalaassisarneq qaffasissumik inissisimalluni.

Kujataani nakorsaanerup, Efa Olsenip, kajumissarutigivaa inuit sapaatip akunneri pingasut sinnerlugit nuattalimmik quersorsimasut, aattalimmik quersorsimasut anerniluttartulluunniit nakorsamut misissortinnissaat.

- Tuberkulose nappaataavoq pimoorunneqartarialik, nappaatillu erngertumik katsorsarneqarnissaa pingaaruteqarluinnarpoq. Bakteriap qinngorneq ultravioletiusoq/seqernup qinngornera saperpaa, imermillu kissartumik qaqorsaatitalimmillu peerneqarsinnaalluni. Taamaattumik inuuniarnermi eqqiluisaarluinnarnissaq pingaaruteqarpoq, Efa Olsen taama oqarpoq.

Piffimmi nakorsaanerup oqaatigaattaaq, ilaqutariit, kammalaatigiit assigisaasalu iluanni nappaammik nalassisoqartillugu suliaq annertooq aallartinneqartartoq.

- Pingaaruteqarluinnarpoq qanigisat tamarmik nappaammut misissorneqarnissaat, ajornerpaatillugumi toqumik kinguneqarsinnaammat, piffimmi nakorsaaneq taama oqarpoq

Powered by Labrador CMS