Kujataani qulimiguulimmik saniatigut angalatitsiniartoqartoq
Kujataani angallanneq ilungersunangaarmat, saniatigut qulimiguulimmik attartortoqarsinnaanersoq, Naalakkersuisut misissorsimavaat.
Ullut arlaqanngitsut qaangiuppata Kujataani angallannerup qanoq iluarsiivigineqarnissaa pillugu pilersaaruteqartoqartoq, Inatsisartuni akunnermi apeqqarissaarfiusumi Aningaasaqarnermut Naalakkersuisup Vittus Qujaukitsup ilisimatitsissutigaa.
Namminersorlutik Oqartussat 8 millionit koruunit angallannermut sillimmatigineqartut atorneqarnissaat, Anders Olsenip Siumumeersup kissaatiginikuuaa.
Ullumikkut aaqqinneqassasoq
- Kujataani ajornartorsiutit aqaguunngitsoq, ullumikkut iluarsineqassapput, Anders Olsen Vittus Qujaukitsumut oqarpoq.
Qulimiguulimmik saniatigut attartornissamik pilersaaruteqartoqartoq, aningaasat taakku 8 millionit koruunit atorneqarnissaat neriorsuutiginagu, Vittus Qujaukitsoq ilisimatitsivoq.
- Kujataani ajornartorsiutit iluarsiiviginiarlugit ulluni tulliuttuni pilersaarummi saqqummiussisinnaanerput naatsorsuutigaarput, kisianni aamma Qeqertarsuup Tunuani, Vittus Qujaukitsoq oqarpoq.