suleqatigiissitaq

Kujataani piareersimarusuttut

Sanaartornermik aatsitassarsiornermillu suliallit kujataani suleqatigiiffittaarput

Kujataani inuussutissarsiortut, ilinniarfiit kommunillu suleqatigiinnerulernissaat anguniarlugu sanaartornermik aatsitassarsiornermillu suliallit suleqatigiiffittaarput.

Suleqatigiiffittami aningaasaqarneq, inuussutissarsiutinik ineriartortitsineq, suliffeqarneq kiisalu piginnaanngorsaaneq ilinniartitaanerlu oqaluuserineqartasapput, aallartitseqataasoq Alex Nørskov ilisimatitsivoq.

- Aningaasaliisartut nunatsinneersut avataaneersullu eqqarsaatigalugit nunatsinni qinikkat suleqatigalugit kujataamiut soqutigisaannik aallussinissamut toqqammavissanik pitsaasunik qangali amigaateqarsimavugut. Anguniakkavut qaffasitsikkusuppavut, nuannaarpungalu aallarniiniartut siunnersuutaat ilassilluarneqarmat, Alex Nørskov oqarpoq.

Suleqatigiiffinnik allanik kingusinnerusukkut pilersitsinissarput siunertarineqarpoq, soorlu ilinniartitaaneq, inuussutissalerineq kiisalu aalisarneq takornariartitsinerlu eqqarsaatigalugit. Tamakku saniatigut inuussutissarsiornermut siunnersuisoqatiginnik pilersitsisoqattaaq, taannalu suleqatigiiffiit assigiinngitsut ataatsimoorfigissavaat.

Suleqatigiiffittaarnera borgmesterimit Jørgen Wæver Johansenimit (S) aamma nuannaarutigineqarpoq.

- Kommunimi inoqarfiit tamarmik sanaartornikkut aatsitassarsiornikkullu suleqatigiinnerminnik nangitsinissaannut suleqatigiiffik taanna pingaaruteqaqaaq. Avataaneersunik oqaloqateqartarnitsinni isumaqatiginninniartarnitsinnilu nunap immikkoortuatut kommunitullu nukittunerulissaagut, borgmesteri oqarpoq.

Powered by Labrador CMS