aatsitassarsiorneq
Kujataani kuultinik ujaasigit
Kujataani piffiit marluk annikitsumik aatsitassarsiornissamut Naalakkersuisut inniminnerpaat.
Kuulti neriusaap naanerani nassaarineqartartoq oqaasinnaarineqartarpoq.
Namminersorlutik Oqartussalli piffiit ujaasiffiusinnaasunik marlunnik maanna tikkuussisinnaapput. Piffiit taakku marluk 10 kvadratkilometerisut annertussuseqarput, Kujataanilu piffimmi Uunartup Kangerluata eqqaani inissisimavoq.
Piffiit taakku marluk maanna annikitsumik aatsitassarsiornissamut inniminnerneqarsimapput. Nunamineralsimut akuersissuteqarfiusimasut ilaat tassani pineqarput.
- Piffiit ujarassiornikkut soqutiginartutut nalilerneqarput, tamaanilu annikitsumik aatsitassarsiornermik ingerlatsiumasut soqutiginartunik nassaarnissamut periarfissagissaarput. Piffinni taakkunani kuultimik nassaarnissaq immikkut ilimanaateqarpoq, taakkulu tikikkuminassusaat annertussusaallu annikitsumik aatsitassarsiornermik ingerlatsisunut soqutiginaateqarsinnaavoq, aatsitassanut naalakkersuisoqarfik allappoq.
- Annikitsumik aatsitassarsiornermik ingerlatsinermik soqutiginninnerup annertusiartornera nuannaarutigaara. Taamatut pitsaasumik ineriartorneq peqataaffigerusuppara. Piffiit soqutiginaatillit annikitsumik aatsitassarsiornermik ingerlatsisunut inniminnerneqarnerat, tamatumunnga ikorfartuutitut suliniutit ilagaat, aatsitassanut naalakkersuisoq Múte B. Egede (IA) oqarpoq.
Piffiup annikitsumik aatsitassarsiortunut inniminnerneqarnissaanik aalajangerneq, Naalakkersuisut piffissami matumani annikitsumik aatsitassarsiornermik ingerlatsisunut sammititanik suliniutaasa arlallit ilagaat. Kingullermik aatsitassarsiornermut inatsisip allanngortinneqarneratigut annikitsumik aatsitassarsiornermik ingerlatsisunut tunngasut eqaannerusunngortinneqarput.