Lufthavne
Kujataani kommunip mittarfinnut pilersaarut kamaatigaa
Ilulissani, Nuummi aamma Qaqortumi mittarfissat nutaat pingasut piareernissaannut piffissamut pilersaarutaasa allanngortinneqarnerat, Kommune Kujallermi politikerit kamaatigisorujussuuaat.
Aallaqqaammut piffissamut pilersaarusiorneq malillugu Kujataani mittarfiliorneq ukialeriartornerani 2018-imi aallartittussaagaluarpoq, sanaartornerlu 2020-mi naammassisussaagaluarpoq.
Pilersaarut allanngortoq
Taanna pilersaarut maanna allanngortinneqarpoq, taarsiullugu aappaagu Nuummi mittarfiup sanaartorneqarnera ukiassalernerani aallartinneqassaaq, Qaqortumilu sanaartorneq aatsaat 2019-imi aallartinneqassalluni. Mittarfiit tamarmik 2022 piareerneqassapput. Qaqortumi mittarfik neriuutigineqartumit ukiunik marlunnik kingusinnerusumik piariissaaq.
- Ilumoorsinnaanngilaq kommuni, attaveqaqatigiinnikkut ajorluinnartumik inissisimasoq, taamaaliinnarluni utaqqisinneqartussanngorlugu inissinneqassappat, Nuummi sanaartortoqarpallaalernissaanik aarlerinartorsiorneq patsisigalugu. Kommune Kujallermi aningaasarsiortoqarpallaalernissaanut aarlerinartorsiortoqanngilaq, paarlattuanilli aningaasaliiumasut suliffissallu amigaatigineqarput, Naalakkersuisunut ammasumik allagaq borgmesterimit Kiista P. Isaksenimit, Stine Egedemit aamma Bentiaraq Ottosenimit atsiorneqartumi taama oqariartortoqarpoq.
Maanna kiffartuussinermut isumaqatigiissutit atuuttut saniatigut ukiunik marlunnik atuinissartik, kommunalbestyrelsimut ilaasortat narrujuummissutigaat.
Nammaqatigiinnerunngitsoq
- Kalaallit Nunarput, pingaartumillu Kommune Kujalleq pisariaqartitsivoq nammaqatigiinnermik aallavilimmik tulleriaarinermi inissinneqarnissaminut, mannami tikillugu Kujataani innuttaasut inuussutissarsiornermillu ingerlataqartut kingullikuutinneqartuarsimanerat mumisinneqartariaqalerpoq. Narsap Qaqortullu akornanni mittarfiup siuarsarneqarnissaanut atatillugu periarfissarpassuit ammarneqartussaagaluit isiginngitsuusaarneqassappata nammaqatigiinnerussanngilaq qitiusumillu aqutsineq annertusarneqassalluni, kommunalbestyrelsi kamattoq taama oqariartuuteqarpoq, oqallinnerup sakkortunera taakku utoqqatsissutigaat.
- Inuiaqatigiinnut akikinnerulernavianngilaq, kiffartuussinissamik isumaqatigiissut nangittumik ukiunillu marlunnik sivitsukkamik nunatta karsianut nammakkersuitinneqaannassappat. Taamaammat Qaqortumi mittarfiliorneq 2018-mi aallartinneqartariaqarpoq, allatut iliorniarnerit akuersaarsinnaanngilagut, politikerit Naalakkersuisunut allagaat sakkortooq taama naggaserneqarpoq.