Eqqartuussineq
Kujataani kilomut ikiaroornartumik tuniniaanermi isertinneqartut: 357.142 koruunit
Ikiaroornatunik tuniniaanermi aningaasat qanoq amerlatigisut isertitarinersut ilisimaneqarpallaanngilaq. Qaqortumi Eqqartuussivimmili paasisaqarfigineqalaarpoq, unnerluussisummi naatsorsuutigaat kilomut 350.000 koruunit isertinneqartartut
Ikiaroornartumik tunisinermi isertitat amerlasoorujussuusinnaasartut ilisimaneqartareerpoq. Tuniniaasulli sulisitsisui qanoq amerlatigerpiartunik isertitaqartarnersut ilisimaneqarpallaanngilaq.
Qaqortup Eqqartuussivianili eqqartuussinermi tamanna paasipajaarneqarsinnaalerpoq. Ikiaroornartunik tuniniaasoqarneranut tunngatillugu eqqartuussineq pingasunngornermi aallartinneqarpoq. Eqqartuussinermi eqqartuunneqartut aqqi taaneqaqqusaanngillat. Angutit marluk 4,2 kilo ikiaroornartoq ataannagu tunisaqarsimasut eqqartuunneqarput. Danmarkip Kalaallit Nunaatalu akornanni aamma ikiaroornartunik eqqussuisumik eqqartuussisoqarpoq.
Sermitsiaq.AG-p allagaatinik qinnuteqareernerani takuneqarsinnaavoq eqqartuunneqartup aappaa ukiup aappaa avillugu parnaarunneqartussatut eqqartuunneqartoq aappa ukiumi ataatsimi parnaarunneqarnissaa pillugu eqqartuunneqartoq. Angutip aappaa Danmarkimi najugaqartuuvoq, politiillu aningaasanik akiligassiisoqartoqarnissaa piumasaqaatigaat.
Unnerluussisut eqqoriaanerat malillugu ikiaroornartoq tunineqaraangat tunisisut annertuumik isertitaqartartut.
Piumasaqaat: 1.500.000 koruunit
Unnerluunneqartut 1.500.000 koruunit nalinganut isertitaqarsimasut unnerluussisut naatsorsuutigaat. Arsaarinnittoqassasoq politiit piumasaqaatigaat unnerluunneqartut eqqartuunneqareeriarpata. Unnerluunneqartut biilii angallataallu aamma arsaarinnissutigineqassasut unnerluussisunit piumasarineqarpoq.
Angutit 4,2 kilo ataannagu ikiaroornartunik tunisaqareernermi kingorna isertitaqangaatsiarsimanissaat naatsorsuutigineqarpoq. Kilomut 357.142,86 koruunit isertitarisimagaat naatsorsorneqartareerpoq - tassani biilinik angallatinillu tunisaqarsimanerat aamma ilaatinneqarpoq. Eqqartuunneqartut namminneerlutik aalajangissavaat kina akisussaaffimmik anginerpaamik suliaqarsimanersoq, taamaasilluni akiligassamik anginerpaamik aamma akiliisussanngussaaq.
Eqqartuunneqartup aappaa aamma savap quttoraanik Qaqortumi pisiniarfiit ilaanni tillissimasutut unnerluunneqarpoq.