Saturday, October 21, 2017 - 09:54

Kujataani ivigaaqqanik arsaattarfik atorneqalerpoq

Assi.: John Rasmussen
Narsami ivigaasaaqqanik arsaattarfittaaq Kommune Kujallermi borgmesteriusup Kiista P. Isaksen'ip atoqqaarfissiortippaa, KAK'lu naggataarutaasumik 2017-imut silami pissartanngorniutsitsilluni.

Borgmesteri Narsarmiut allallu najuuttut tamaasa pilluaqqungaarpai.

'Kujataani Narsami ivigaasaaqqaanik arsaattarfissaq naammassilerneqarneranut ulloq kiisami nalliuppoq, taanna oqarpoq nangillunilu, nuannaarutigaara oqalugiartuunissara timersortarfissarlu nutaaq ammaanersiorlugu.

Arsaattarfiit nutaat ukiuni arlalinni sinnattorisarsimavagut, sinnattullu massakkut piviusunngortinneqarput.

Narsarmiusuulli tulluusimaarlungalu nuannaarpunga. Ukiorpanngortuni Kujataa isikkamik arsaannermik aaqqissuussiffiusarsimavoq, ullumikkulli ulloq immikkuullarippoq isikkamimmi arsaannerup tungaatigut periarfissanippoq.

Atuaruk: Scooterit nersussuillu arsaattarfik ivigaasalik aserorterpaat

KAK'llu Qaqortumi silami Cup'ertitsinissaralua ullumikkumut kinguartinneqarsimavoq ulloq nalliuttorsiutiginiarlugu.

Kujataani illoqarfinni ivigaasaaqqanik arsaattarfeqarnissaat anguniangaavoq, qularutiginngilaralu timersortartut takutittagaasa qaffasinnerulerlutillu kajumminnarnerujumaartut, borgmester Kiista P. Isaksen oqarpoq.

Qaqortumi Narsamilu arsaattarfissat ukiup tulliani naammassineqassapput. Kiista P. Isaksen naggasiilluni arsaattarfiup paarilluarneqarnissaa nunaqqatitillu illersorluartaqullugit oqaaqqissaarutigaa.

Tamatuma kingorna kommunimi kulturimut ataatsimiititaliami siulittaasoq, Benjamin Kielsen, aamma naatsumik oqalugiaateqarpoq.

KAK'p 2017-imut naggataarutaasumik silamik pissartanngorniutitsinerani angusarineqarput:

U-15-inut Qaqortuminngaanneersut K-33 hold 1. kuultinnapput. Narsaminngaanneersut N-85 sølvinnallutik Qaqortuminngaanneersullu K-33 hold 2-vi bronzennallutik.

U-13-inini Narsaminngaanneersut N-85 kuultinnapput, K-33 hold 1. sølvinnallutik K-33-illu hold 2-vi bronzennallutik

Aamma atuaruk: Narsaq, Qaqortoq Nanortalillu ivigaasanik arsaattarfittaassapput

Seneste nyheder / Nutaarsiassat kingulliit