Kujalleq
Kujataani inuit uumasullu teriannianit kiineqarput
Terianniat qanillattussanngilasi, Kalaallit Nunaanni nakorsaaneq uumasullu nakorsaat innuttaasunut kajumissaaripput
Kalaallit Nunaanni nakorsaaneqarfik aamma Kalaallit Nunaanni Uumasut Nakorsaqarfia Inuussutissalerinermullu Oqartussaaffik innuttaasunit sapaatip akunnerini kingullerni marlunni ilisimatinneqartarput kujataani terianniat inunnik uumasunillu kiisisarsisartut.
Atuaruk: Qaqortumi inuit marluk teriannianit kiineqartut
Perlerortut
- Terianniat qanillattorniartuarput – taamaattumik innuttaasut kingumut kaammattorusuppagut teriannianut qanillattoqqusarnagit. Terianniamik qimmimilluunniit perlerortumik kiitikkuit peqqinnissaqarfimmukassaatit, tassani kiitinnerit salitsissavat suliaritillugulu, Kalaallit Nunaanni nakorsaaneq, Henrik Trykker, naalakkersuisut.gl naapertorlugu erseqqissaavoq.
Nujuanngitsut
- Terianniat perlilertillutik perlerortillutillu illoqarfinnut qanillattortarput, nujuarunnaarsimasarlutillu, uumasut nakorsaat Sanne E. Wennerberg oqarpoq.
Terianniat perlerortut amerlanertigut qaasuttuusarput upanninniartuusarlutillu. Amerlanertigut paatsiveerussimaartuusarput nuffiortarlutillu.
Toqunneqartassasut
Illoqarfinnut qanillattornaveersaarnissaannut periarfissatuarineqartoq tassaavoq nerineqarsinnaasunik eqqaanaveersaarnissaq, nerineqarsinnaasut uumasunut taakkununnga qanillattuutaasarmata.
Qanillisut toqunneqartassapput. Kommune Kujalliup terinniat qimmillu pitunneqanngitsut toquttassallugit aalajangersimavaa, taakkuninnga siumugaqartuartillugu toqutsisoqartassalluni, nakorsaaneq erseqqissaavoq.
Terianniamik siumugaqaruit tamanna kommunimut politiinulluunniit nalunaarutigissavat, nakorsaaneq uumasullu nakorsaat kajumissaapput.
Atuaruk: Teriannissat perlerortut Kujataani ajornartorsiutigineqartut