Kujataani ikioqquneq: Umiatsaararsorlutik aalisartut piniartullu annertuumik ajornartorsiorput
Kujataani ukiuunerata aallartinneraniilli sila immikkut ittumik ajornartorsiortitsivoq.
Novembarimit januarimut anorersuaqattaarpoq. Tamatuma kingorna sapaatip-akunnerini tallimani arfinilinniluunniit assut qerinnarpoq, Narsap eqqaanilu kangerluk sikuvoq, kangerluillu maanna aamma sikoqaqqilerput. Maanna sikorsuaqarluni aamma sermimit sikoqarluni.
Aningaasaqarnikkut ilungersunartoq
Umiatsiaararsorluni aalisartoq aamma piniartoq Jens Davidsen, najukkami aalisartut piniartullu peqatigiiffiani NAPP-mi aningaaserisup oqaluttuaraa, ukiorluunera ilaasortanut aningaasaqarnikku ilungersunarsimasoq.
Ukiuunera anorersuit tulleriaarnerannik aallartippoq. Kingornalu kangerluk sikuvoq. Maannakkullu sikorsuit ingerlaarput, taamaammallu aalisariarnissaq ajornakusoorpoq, anori, sarfaq aamma ulittarnera malillugu siku nikeraannavippoq.
Jens Davidsenip aalisaatini sikoqanngitsumut ningillugit misilittarsimagaluarlugu oqaluttuarpoq, kisianni aqaguani uteraangami aalisaatai tammarsimanngikkunik sikumit aserorneqarsimasarput. Sikoqartukkullu angalaniarnerinnaq unamminartarpoq.
Peqatigiiffiup ilaasortaasa ilaat suliffissarsiortutut kommunimut nalunaarlutik ikiiorneqarniarsimapput. Kisianni tassani umiatsiaararsorluni aalisartuugaanni namminersorluni inuussutissarsiortuunerarneqarlutik suliffissarsiortutut nalunaaruteqaannarsinnaanngitsut paasitinneqartarput.
Ajunaarnersuarmi ikiorneqarneq
Taamaammat peqatigiiffik Nuummi kattuffiup qullersaqarfianut siunnersorneqarniarluni saaffiginnippoq, taakkulu ajunaarnersuarmi ikiorsiisoqarnissaamik qinnuteqarnissamut siunnersuisimapput.
Taassuma qinnuteqaatip qanoq ingerlanera ilisimaqqissaanngilaa, kisianni suli tusagaqarsimanani oqarpoq.
Jens Davidsenip ilanngullugu oqaluttuaraa, aalajangersimasumik atorfilimmik aappaqarami iluatsitsisut akornanniilluni. Aalisartoqataasa ilaat kisimiillutik pilersuisuupput, ilaallu aamma angallatiminnut aquuteralamminnut taarsigassarsianut akilersuisuupput, taamaammat taakku ilungersortorujussuupput.
Nipisanniarneq ulorianartorsiorfiusoq
Nipisanniarnissarlu piffissamik imaluunniit pisassat nungunnissaannut killiligaammat taassuma ernumassutigaa.
Nipisanniarnerummi aningaasaqarneq ataqatigiissittarpaa, sikulu sivisunerusumik atassappat ajunaarnersuaqassammat.