Kommunimut qinersineq 2017
Kujataani borgmesterinngorniunneq
Kommune Kujallermi Siumukkormiut misilittagallit marluk qinersisartuni nuannarineqarniutissapput. Maanna borgmesteriusoq – siusinnerusukkullu borgmesteriusimasoq. Kingullermik taasisui 15-iinnarnik nikingapput.
Kujataani pissanganassaqaaq marlunngorpat unnukkut qinersiviit matoreerpata taasinerit kisinneqalerpata.
Taasinerit 15-it nikingassutaasut
Kommunimut qinersinermi kingullermi taqqavani politikerit Siumumeersut nuannarineqarnerpaat marluk taasisui 15-iinnarnik nikingapput. Simon Simonsen 282-inik taaneqarpoq, Jørgen Wæver Johansenilu 297-inik taaneqarluni. Taamaasilluni Jørgen Wæver Johansen Qaqortumi borgmesterip allaffianut ingippoq – Simon Simonsenillu borgmesterip tulliatut atorfik naammagiinnartariaqarpaa.
Kommune Kujallermi Siumut amerlanerussuteqarluarpoq.
Simon Simonsen – qinersinermi siuliani (2008-mi) kommunimi 611-nik taaneqarluni taaguunneqarnerpaasimasoq 2013-illu tungaanut borgmesteriusimasoq – AG-mut oqarpoq borgmesteritut atorfik tigoqqinniarlugu naggataa tikillugu akiuunniarluni.
– Piareersimalluinnarpunga, taanna oqarpoq.
– Soormi illit taassavaatsit Wæver Johansen pinnagu?
Qanimut suleqatigiinneq
– Isumaqarpunga arlaannattaluunniit aappani eqqartornerlukkusunnavianngikkaa. Qinigaaffimmi matumani qanimut suleqatigiissimavugut. Inuttulli assigiinngitsorujussuuvugut. Uanga inuppalaarneruvunga, Simon Simonsen akivoq.
Jørgen Wæver Johansen sapaatip akunnerini kingullerni qineqqusaarnermi saqqumnilaarsimanngilaq. Marsip qiteqqunnerani nukaa toquvoq, taannalu sapaatiummat Nuummi ilisaavoq.
Akinissamut nukissaqartoq
AG-lli apeqqutaanaut akissuteqarnissaminut nukissaqarpoq, aperigatsinni kommunimi illoqarfiit sisamat nunaqarfiillu 11-t ukiuni tulliuttuni sisamani qanoq politikkikkut aquttariaqarnersut.
Borgmesternngorniuttut marluk apersorneqarnerat aviisimi AG-mi saqqummertumi kingullermi atuaruk, digitalimik uani ataani linki atorlugu akiliillutik atuarsinnaavat: