katersuunneq annertooq
Kujataa aasaanerani Siumumut qaaqqusisuussaaq
Qaqortumi aasaanerani ataatsimiinnermi partiip peqataasussat 90 sinneqartut naatsorsuutigai. Socialdemokraatit siulittaasuat Mette Frederiksen aamma ataatsimiinnermut peqataasssaaq
Partii naalakkersuisoqatigiinniittoq Siumut, aasaanerani Qaqortumi ataatsimeersuartitsiniarpoq.
Tamanna juunip 30-anit juulip arfernanut pissaaq, partiillu naatsorsuutigaa ataatsimiinnermut peqataasut 90-t sinneqarnissaat.
Nuimasunillu aamma peqataasoqarumaartoq, partiip allattaanera Mikael Petersen Sermitsiaq.AG-mut oqarpoq.
Inuit nuimasut
Siumup Danmarkimi partiini suleqataanit, Socialdemokraatinit siulittaasoq, Mette Frederiksen peqataassaaq, aamma SIK-mi siulittaasoq, Jess G. Berthelsen aasaanerani ataatsimiinnermut peqataassaaq.
- Programmip annerpaartaa piareereerpoq, Mikael Petersen oqarpoq.
Siumup anguniagai
Taassuma ilisimatitsissutigaa, ataatsimiinnermi aamma pikkorissaasoqassasoq.
- Taakku nittartakkakkut inuit attaveqatigiittarfiinik atuinermut, partiip anguniagaanut aamma attaveqarnermut tunngassapput.
Qaqortumi ataatsimiinnermiinnermi aamma anguniakkat oqaloqatigiissutigissavaat, aappaagumullu kommuninut qinersinissanut piareersaanerit aallartissapput.
Atuaruk: Siumut: Tusagassiorfiit nuannarinngilaatigut