Kujalleq
Kujallermi suleqatigiinnermit Inuit Ataqatigiit anipput
Kommunalbestyrelsip ataatsimiititaliaani siulittaasuuffiit agguataarnerat partiip naammaginngilaa
2013-imi qinersinerup kingorna Kommune Kujallermi Inuit Ataqatigiit Siumut Atassullu suleqatigiinnissamik isumaqatigiissuteqarfigaat, tunngavilersuutigalugu Kujataani unammilligassarpassuaqartoq, taamaallaat suleqatigiinnikkut qaangerneqarsinnaasunik.
Ataatsimiititaliaq nutaaq
IA naapertorlugu suleqatigiinneq ingerlalluarsimagaluarpoq, kommunalbestyrelsip ataatsimiititaliaani siulittaasuuffiit agguataarnerisa aaqqiagiinngissutaalernera tikillugu. Meeqqat atuarfiata sammineqarnera nukittorsarniarlugu aalajangertoqarpoq atuarfeqarfimmut immikkut ataatsimiititaliortoqassasoq. Taamaasillunilu ataatsimiititaliat tallimaajunnaarlutik arfinilinngormata IA-mut pissusissamisoorsimavoq ataatsimiititaliani siulittaasuuffiit kommunalbestyrelsimi partiinut pingasunut agguarneqassasut.
Ullumikkut IA ataatsimik siulittaasuuffeqarpoq - isumaginninnermut ataatsimiititaliami - Siumullu ataatsimiititaliat sinnerini sisamani siulittaasuutitaqarluni. Atassut siulittaasuuffeqanngilaq.
Tunuarpoq
Maanna IA suleqatigiinnermit tunuarpoq politikkikkut inissisimaffiit agguataarnerat naammaginagu.
– Siumut aalajangersimavoq ataatsimiititalianit arfinilinnit IA siulittaasuuffimmik ataasiinnarmik tigumminniinnassasoq. IA kommunalbestyrelsimi ilaasortat pingajorarterutaannik ilaasortaatitaqarpoq. Taamaattumik qinersinerup inerneranit, ileqqorissaarnissamit minnerunngitsumillu suleqatigiinnissamit isigalugu IA-mit akuersaarneqarsinnaanngilluinnarpoq ataasiinnarmik siulittaasuuffeqarnissaq. Pissaaneqarumanikkut suleqatigiinneq aserorneqarpoq, IA-p gruppiani siulittaasoq Kelly Berthelsen tusagassiorfinnut nalunaarutikkut erseqqissaavoq.
Pituttorsimanngitsoq
– Taamaattumik Kommune Kujallermi Inuit Ataqatigiit aalajangerput suleqatigiinnissamik isumaqatigiissummut 2013-imeersumut pituttorsimajunnaarniarlutik, kisermaassiniarluni aqutsilluni suleqatigiinnermut peqataajumannginnatta taanna oqarpoq.