Kujallermi IA kommunimi pisortamut tatiginnikkunnaarpoq

Kommuneq Kujallermi kommunalbestyrelsimi Inuit Ataqatigiit gruppiata kommunimi pisortamut Frank Hedegaard Jørgensenimut tatiginnikkunnaarput.

IA-p qinigaatitaasa naqissuserpaat, ilaatigut inunnik isumaginnittoqarfimmi ajornartorsiutit arlallit - suliassarpassuit - kommunimi pisortap akisussaaffigigai.

Qisuariarfigineqanngitsoq
- Kommunalbestyrelsip junimi ataatimiinnerani Inuit Ataqatigiit sinnerlugit qinigaasugut nalunaarutigaarput allaffissornikkut pisortaanermut tatiginnikkunnaaratta. Tamannali manna tikillugu borgmesterimit qisuariarfigineqanngilaq, gruppimi siulittaasoq Stine Egede, tusagassiuutinut nalunaarummi allappoq.

Atuaruk: Kommune Kujalleq isumaginninnerup tungaatigut ikiortissarsiorpoq

IA-mi gruppip ingammik siunnersuisartut BDO-p qanittukkut kommunip allaffissornikkut aqutsinera arlalitsigut isornartorsiuisimanera maluginiarpaa.

Aningaasarsianut systemi pitsaaneq
- Ullumikkut isumaginnittoqarfiup iluani pisut killiffii allaasinnaagaluarput siorna aasakkut suli siulittaasuutitaqarnitsinni piumasarisimagaluarparput piviusunngorsimasuuppat, Stine Egede erseqqissaavoq.

Taassuma tikkuarpaa, Qallunaat Nunaannit ikiortigisat uninngaannarnissaat ajornanngippallu amerlineqarnissaat partiip siunnersuutigisimagaa, aammalu ammasarfiit allannngorneqartariaqartut, sullitanut samminninnissamut piffissaqarnerulerniassammat.

Akerlilerneqartut
- Ajoraluartumik tamakku qullersaanermit periarfissarsiuunneqaratik akimmisaarfigineqaannarput. Ukiumi nutaami Isumaginninnermi pisortamik suliunnaarsitsineq allagaqarluta suliunnaarsitsinermut tunngaviusut apeqquteqaatigaavut, mannalu tikillugu pisortaanermit akineqarnikuungilagut, tusagassiuutitigulli susoqarneranik paasisaqartarpugut, siulittaasoq erseqqissaavoq.

Atuaruk: Isumaginnittoqarfik tukattoq paasisat nutaat uppernarsarpaat

Paasissutissiisoqanngitsoq
Taassuma saniatigut politikerit illuatungiliuttut, kommunip Nunamineralsimi pisortaasimasoq, Ole Christiansen, aatsitassarsiornermut siunnersortitut atorfinitsinneqarsimanera tusagsassiuutitigut paasisimagamikku tupigusuutigaat.

Atuaruk: Meeqqat illersuisuat Kujallermi pisut eqqasuutigai