Inuiattut ullorsiorneq
Kujallermi borgmesteri: Nuugaatsiami innuttaasut eqqaamavagut
Kommune Kujallermi borgmesteri Inuiattut ullorsiornitsinnut tunngatillugu oqalugiaateqarpoq
-Eqqaamavagut Nuugaatsiarmiut allallu tamaasa minnerusumik annerusumilluunniit ajunaarnersuarmik eqqugaallutik ulluni makkunani imaannaanngitsunik atugaqartut, ilaqutariit nunaqqatigiit, ikiuuttorpassuillu tamaasa uummatitsinnit qamanngavik misigeqatigalugit eqqarsaatitsinnik najorpagut.
Kommune Kujallermi borgmesteri, Kista P. Isaksen Inuiattut ullorsiornitsinni oqalugiaammini aallaqqaasiulluni taama oqarpoq.
- Kalaallit Inuit, Inuiattut ullorsiortarpugut ullormi matumani tamatta peqatigiilluta, saqqummersikkumallugu inuiaqatigiittut ataatsimoortuarnerput, aammalu siuaatsinnik kalaallinik ataqqinninnerput qujassutigiumallugu, kiisalu Nunatsinnut asasatsinnut suleqatigiilluta sullissiuarumanerput takutikkumallugu, taanna oqalugiaammini ilaatigut taama oqarpoq.
Ataqatigiinneq, qanilaasuseq, asanninneq, akisussaaqatigiittarnerlu aamma maanni pigisarput ineriartortitsigu tamattaalluta, Kista P. Isaksen ilaatigut oqarpoq.
- Ilami kinguaasatsinnut pisussaaffeqarpugut Nuna peqqissoq najoruminartorlu kingornutassiarissallugu.
Ineriartornerlu ingerlajuarmat pissusissamisut isigineqartariaqarsoraara Nunarput imminut napatittoq namminersortorlu aamma siunnerfigalugu kinguaasatsinnut nangitassanngorlugu ingerlatissagipput.
- Oqaluttuarisaanitsinni pingaarutilissuarmik angusaqarpugut, tassami tunngaviusumik Inatsisissaq pillugu isumalioqatigiissitamik pilersitsisoqarnikuuvoq, suliaqartuni annertuumik pingaartinneqarpoq inuiaqatigiit tamattaalluta nunatsinni, illoqarfinni nunaqarfittatsinnilu tamat peqataatinneqarnissaat, taammaaliornikkut piginneqataasutut misigaluta sunniuteqaqataaniassagatta, Kista P. Isaksen oqalugiaammini ilaatigut taama oqarpoq.
Allaaserisap ataani assit takukkit