aatsitassat
Kuannersuit Naalakkersuisut eqqartoqqilerpaat
Aatsitassarsioqatigiiffik Greenland Minerals and Energy aamma Naalakkersuisut Kuannersuarni suliniut pillugu ataatsimiilerput
2014-mi ukiup affaani siullermi Greenland Minerals and Energy Kuannersuarni aatsitassarsiorfimmik ammaaniarnissamut pilersaarummik suliaqarniarpoq. Maanna Naalakkersuisut aamma aatsitassanut pisortaqarfik ataatsimeeqatigilerpaat. Suli ullulerneqanngilaq Kuannersuarni aatsitassanik qaqutigoortunik, uranimik zinkimillu qalluinissamik Greenland Minerals and Energy qinnuteqassamaarnersoq.
Naalakkersuisut aamma Greenland Minerals and Energyp ataatsimiinnerat upernaap ingerlanerani ataatsimeeqataarnissat siullersarigaat, Greenland Minerals and Energy nalunaarpoq.
Suleqatissarsiorput
Australiamiut aatsitassarsiorfiat taanna Kuannersuarni aatsitassarsiorfimmik ammaanissamik soqutiginnippoq tassani aatsitassat qaqutigoortut, uran aamma zink annertoorujussuit nassaassaammata. Aatsitassarsiorfimmik ammaanissamik suliniut anorigissaaqqilerpoq uranimut naaggaarluinnarsimaneq Inatsisartuni amerlanerussuteqartut oktoberip 24-at atorunnaarsimmassuk.
- Tamanna pimmat aatsitassanik qaqutigoortunik qalluisinnaaneq ammaanneqarpoq, Greenland Minerals and Energy nalunaarpoq.
Naalakkersuisunik aamma Aatsitassanut pisortaqarfimmik ataatsimeeqateqarnerit aallarniutaassapput Kuannersuarni aatsitassarsiornissamut qinnuteqaatip tunniunnissanut pilersaarutip inissitsiterluarnissaanut.
- Greenland Minerals and Energymit suliniummi suleqatigineqarsinnaasunik attaveqarnerit ingerlaqqissapput, Greenland Minerals and Energy nalunaarpoq.
Aatsitassarsioqatigiiffik PDAC-mik taaneqartartumik Canadami ataatsimiinnermi peqataaniarpoq. Tassani Greenland Minerals and Energy aamma Aatsitassanut pisortaqarfik periarfissaqassapput aatsitassarsiornermik suliallit nunanit tamalaaneersut katersuunneranni Nunatsinni aatsitassarsiornissamut periarfissanik saqqummiussinissamut.
Greenland Minerals and Energyp aamma pilersaarutigaa Nunatsinni ataatsimiisitsinerit suliaqaatigalunilu isumasioqatigiinnerit martsimi aprilimilu siunissamut pilersaarutinik saqqummiussaqarluni.
Kuannersuarni suliniut pillugu annerusumik Sermitsiaq nr. 5-mi atuarsinnaavutit linkimi ataaniittumi aaneqarsinnaasumi.