umiartorneq

Kruse: Umiarsuit Nunatta Canadallu akornisigoortariaqanngillat

Umiarsuit Nunatta Canadallu akornisigoortartut amerliartussagaluarpata, tamassuma piniarnermik inuussutissarsiummut kinguneqaateqassasoq Aalisarnermut Piniarnermullu Naalakkersuisup Karl-Kristian Krusep aarlerinartoqartippaa

Karl-Kristian Kruse

Nunatta Canadallu akornisigut umiarsuarnik angallattoqarnerulersinnaanera aalisarnermut piniarnermullu Naalakkersuisup Karl-Kristian Krusep (S) aarlerinartoqartippaa.

Aarlerissuteqarnerat isumaqatigaa

– Umiarsuit tamaana angallattalernissaannik Qaanaami piniartut aarlerissuteqarnerat isumaqatigaara, tassa sila kissatsinnerulerpat umiarsuit Nunatta Canadallu akornanni ikerasakkoortalissammata. Pingaartumik ernumanartoqartippara aatsitassarsioqatigiiffiup, Pearylandimi Citronenfjordimi zinkimik aqerlumillu piiaaniartup, Nunatta Canadallu akornanni ikerasak aatsitassanik assartuinermut atorniassaneraa, Karl-Kristian Kruse tusagassiorfinnut nalunaarutikkut tikkuaavoq.

Kommissioni

Tamatumunnga atatillugu neriuutigaa ICC-p Pikialasorsuarmut ataatsimiititaliaata, 2016-imi januaarimi pilersinneqartup, inassutigiumaaraa Pikialasorsuakkut umiarsuarsuarnik angalaneq tamarmi inerteqqutigineqassasoq.

– Umiarsuit angisuut tamaanaqquuttarnissaannik inerteqquteqalinngippat tamanna piniarnermik inuussutissarsiuteqartunut ajunaarnersuussaaq, piniagassat tamaanngaanniit allamut nuussammata, naalakkersuisoq tikkuaavoq.

Tusarniaanerit

Kommissioni Canadap avannarpasinnerusortaani tusarniaanernik ingerlatsivoq, kingornalu Avannaani tusarniaasoqassaaq.

Uumasoqarluartoq

Karl-Kristian Krusep tikkuarpaa Pikialasorsuaq uumasoqarluartuusoq. Tamaaniipput qilalukkat, aarrit, nannut puiserpassuillu. Tamatumalu saniatigut tamanna timmiarpassuaqarpoq.

Pikialasorsuaq Baffin Bugtip avannarpasissuaniippoq, Kalaallit Nunaata Canadamilu Ellesmere Islandip akornanni, Smith Soundip Nares Strædillu eqqannguanniilluni.

Powered by Labrador CMS