Aalisarneq
Kruse: Nunaqavissut avaleraasaartoorniarnermi salliussapput
KNAPK-p kissaatigaa sinerissap qanittuani saarullittassat 40.000 tonsinut amerlaneqassasut. Naalakkersuisunut ilaasortap kissaatigineqartup eqquutsinneqarnissaa neriorsuutigineqarsinnaanngilaa
- Nunatsinni ingerlatseqatigiiffinnut namminneerlutik kilisaataatilinnut aalisariutaatilinnullu Naalakkersuisut aalisakkanik pisassiisarnerminni salliutitsisassallutik politikkeqarput. Tamanna ukioq manna avaleraasartoorniarnissami allaanerussuteqarnavianngilaq.
Aalisarnermut, Piniarnermut Nunalerinermullu Naalakkersuisoq Karl-Kristian Kruse Siumut, oqarpoq.
KNAPK-mut ataatsimeeqateqareerluni taamatut erseqqissaavoq.
KNAPK Naalakkersuisuni ilaasortamut erseqqissaavoq avaleraasartoortassat pisassiissutigineqassatillugit nunaqavissut salliutinneqartassammata.
- Avaleraasartoorniarnissamut siorna qinnuteqartut pingasunngorlugit pingaarnersiugaapput. Kalaallit aalisariutaataat salliutinneqarlutik, aalisariutilluunniit nunatsinneersunit inuttalerlugit attartorsinnaallutik. Tulliulluni kilisaataatillit kilisaatiminnik aalisartitsisut aalisariummik attartorlutik aalisartitsisinnaallutik. Pingajuullutik ingerlatseqatigiiffiit kilisaataateqanngitsut, Karl-Kristian Kruse ilisimatitsivoq.
KNAPK-p kissaatigaa sinerissap qanittuani saarullittassat 40.000 tonsinut amerlaneqassasut. Tamannalu Naalakkersuisunut ilaasortap kissaatigineqartoq naapertorlugu pisassiisoqarsinnaaneranik ilisimasaarisinnaannginnerarpoq sinerissap qanittuani saarullinnut paasissutissat killeqaqimmata.
- Naalakkersuisut sinerissap qanittuani ukioq manna saarullittassat pillugit ullut 14-init qaangiutsinnagit aalajangigaqartussaapput, soorlu aamma avataani saarullinniarnissamut apeqqut aamma oqaluuserineqassasoq, Karl-Kristian Kruse oqarpoq.